ԵՐԿԻՐԱՆ ԹՌՉՈՂ ԱՎՏՈՄՈԲԻԼ Պ. Ք. Գերմանական Carplane ընկերությունը Ֆրիդրիխսհաֆենի ավիացուցահանդեսում ներկայացրել է նախատիպը այն թռչող ավտոմեքենայի, որի առաջին թռիչքը պետք է կայանա ընթացիկ ամռանը: Նորույթի տարբերիչ գիծը նման փոխադրամիջոցների համար անսովոր երկիրան կառուցվածքն է: Այդ մասին հաղորդում է Aviation Week պարբերականը: Մշակողների խոսքերովՙ նման կառուցվածքը մեքենայի լավ կառավարելիություն է ապահովում գետնի վրա շարժվելիս: Այդ դեպքում ծալովի թեւերը պահվում են երկու իրանների միջեւ, ինչը բացառում է վերամբարձ ուժի հայտնվելը մեծ արագությունների ժամանակ: Բացի դրանից, նվազում է կողային ուժեղ քամու բացասական ազդեցության հավանականությունը, քամի, որը վտանգավոր կլիներ, եթե թեւերը ծալվեին թափքի երկայնքով: Տվյալ կառուցվածքը թույլ տվեց օգտագործել լիարժեք 15 դույմանոց ճանապարհային անիվներ: Երկիրան հորինվածքը նվազագույնի է հասցնում թռիչքի ժամանակ առաջացող անվիների բացասական աերոդինամիկ դիմադրությունը: Ավտոմեքենա-օդանավը հանդերձավորված է 850 խոր. սմ ծավալով տուրբինացված 151 ձիաուժ երկգլանավոր շարժիչով, որը սպառում է ոչ էթիլային բենզին: Շարժիչը զուգորդվում է 7 դիապազոնանոց հատուկ շարժահաղորդչի հետ: Գետնի վրա շարժվելու համար նախատեսված է հինգ փոխանցում (այդ թվում մեկըՙ հետընթացի համար), վեցերորդը թռիչքի ժամանակ պտտման ուժ է հաղորդում պտուտակին, իսկ յոթներորդ աստիճանը արագ վերսլացքի համար միաժամանակ շարժման մեջ է դնում պրոպելլերն ու անիվները: Թափավազքի համար պահանջվում է մոտ 80 մետր: Մոտավորապես նույնքան տարածություն է անհրաժեշտ վայրէջքի եւ լիակատար դադարի համար: Gizmag հրատարակությունը մանրամասնում է, որ թռիչքի հեռավորությունը 833 կմ է, փաստական բարձրակետըՙ 4570 մետր: Թռիչքի միջին արագությունը ժամում 200 կմ է, գետնի վրա առավելագույն արագությունըՙ 176 կմ/ժամ: Մեքենայի քաշը 795 կգ է: Թռչող ավտոմեքենայի մշակումը ֆինանսավորում են Եվրոմիությունը եւ Ներքին Սաքսոնիա երկրամասի իշխանությունները: Սպասվում է, որ գործող սարքը պատրաստ կլինի հուլիսին, իսկ հետո հավաստագրման աշխատանքներ կծավալվեն մասնավոր ներդրողների ներգրավմամբ: Ենթադրվում է, որ մեքենան համապատասխան հավաստագրեր կստանա 2018-ին: Ներկայումս թռչող ավտոմոբիլների ամենահայտնի մշակողը Terrafugia ֆիրման է: 2009 թ. ամերիկացիները ցուցադրեցին իրենց առաջին մոդելըՙ Transition-ը, որը հավաստագրվեց որպես «թեթեւ մարզական օդանավ»: Ընկերությունն այժմ մշակում է հիբրիդային ուժակայանքով եւ ուղղաբերձ թռիչքի համակարգով մեքենա: | 
