ԳՈՐԾՆԱԿԱՆ ՔԱՅԼԵՐՙ ՈՒՂՂՎԱԾ ԱԶԳԱՅԻՆ ԵՐԱԺՇՏՈՒԹՅԱՆ ԵՎ ԱՐՎԵՍՏԻ ՊԱՀՊԱՆՄԱՆԸ ՎիվաՍել-ՄՏՍ-ի, Մշակույթի նախարարության եւ «ՊրոԱրտ» ընկերության գործակցության արդյունքում ստեղծված եւ ավստրիական ճանաչված SONY DADC ընկերության գործարանում հրատարակվածՙ «Հայկական ժողովրդական նվագարաններ» ալբոմն իր պատվավոր տեղն է գտել Դիլիջանի ամենահին շինություններից մեկում: 19-րդ դարում այն իշխանուհի Մարիամ Թումանյանի համար ծառայել է որպես ամառանոց, իսկ խորհրդային տարիներիցՙ ստանձնել է ժողովրդական արվեստի պահպանման առաքելությունը, հետագայում վերածվելով Ժողովրդական արվեստի կենտրոնիՙ Դիլիջանի մասնաճյուղ-թանգարանի: Այդ հարցում իր կարեւոր ներդրում է ունեցել Վանից գաղթած, Դիլիջանի հին փողոցի նախագծման աշխատանքներին մասնակցած, վաստակավոր նկարիչ Հովհաննես Շարամբեյանը, ում անունն էլ կրում է թանգարանը: Այսօր թանգարանը ստեղծագործական մտքերի քննարկման յուրօրինակ հավաքատեղի է դարձել Դիլիջանի ստեղծագործողների համար: Ութ ձայնասկավառակից բաղկացած, թվայնացված «Հայկական ժողովրդական նվագարաններ» ալբոմը սերունդներին փոխանցվող ինքնատիպ ժառանգություն է: Այն դուդուկի, քանոնի, քամանչայի, թառի եւ ազգային երաժշտական ավելի քան 10 գործիքի համար գրված ստեղծագործությունների հավաքածու է: Շուրջ 1000 օրինակով թողարկված ալբոմը ստեղծվել է Հայաստանի հանրային ռադիոյում պահպանվող ձայնագրությունների եւ մասնավոր հավաքածուների հիման վրա, ալբոմի ստեղծմանը մասնակցել են Հայաստանի լավագույն դիզայներները, թարգմանիչները, հնչյունային ինժեներները, երաժշտագետները եւ մշակութային գործիչները, իսկ ստեղծագործությունները ներկայացնում են հայտնի կատարողները: Թանգարանի ցուցադրությունների շունչն ու ոգին լրացնող ազգային երաժշտությունը կնպաստի նաեւ հայկական նվագարանների նկատմամբ հետաքրքրության մեծացմանը եւ մարզում մշակութային կյանքի աշխուժացմանը: Ալբոմը նախատեսված չէ վաճառքի համար եւ տրամադրվելու է ազգային երաժշտության տարածմանն աջակցող հաստատություններին: «Մշակույթը յուրաքանչյուր ազգի հոգեւոր նկարագիրն է: Ժամանակին համահունչ լինելով հանդերձՙ անհրաժեշտ է հնարավորության սահմաններում մաքուր պահել ազգը սնող աղբյուրը: Որքան էլ անսպասելի հնչիՙ այդ հարցում անչափ մեծ է մարզերի դերը: Մեր այստեղ լինելը պատահական չէ. եթե ձեզ հաջողվել է աչքի լույսի պես պահել 19-րդ դարի այս շինությունը եւ այն վերածել թանգարանի, ուրեմն ազգային գործիքների համար թվայնացված ալբոմն իր արժանի տեղն է գտել: Ստեղծված ձայնասկավառակներն իրական արժեք են, եւ հույս ունեմՙ կծառայեն ազգային երաժշտության եւ արվեստի պահպանման նպատակին»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: Հիշեցնենք, որ կողմերի գործակցության արդյունքում, նույն սկզբունքով ստեղծվել էին նաեւ «Հայաստանի հանրային ռադիոյի ոսկե ֆոնդ», «Արամ Խաչատրյան-110», «Կոմիտաս-145» ալբոմները: Չորս ալբոմից կազմված թվայնացված ձայնասկավառակների հավաքածուն համալրել է Հանրային ռադիոյի ձայնադարանը: Գործակցող կողմերի որոշմամբ, թանգարանին նվիրվեցին թվարկված բոլոր ալբոմները: Մշակույթի զարգացմանն ուղղվածՙ վերը նշված ծրագրերի իրականացման համար, ՎիվաՍել-ՄՏՍ-ը կատարել է ավելի քան 89 մլն. դրամի սոցիալական ներդրում: | 
