«ՎԵՐՋԻՆ ԲՆԱԿԻՉԸ» ՆՅՈՒ ՋԵՐՍԻՈՒՄ ԵՎ ԲՈՍՏՈՆՈՒՄ Հ.Ծ. «Ֆեր Լոունի» (Նյու Ջերսի) Սբ. Լեւոն հայկական եկեղեցու դահլիճում փետրվարի 16-ին ամերիկայի արեւելյան ափում առաջին անգամ ցուցադրվել է մրցանակակիր ռեժիսոր Ջիվան Ավետիսյանի «Վերջին բնակիչը» ֆիլմը, որի երաժշտության հեղինակն է Սերժ Թանկյանը : Ֆիլմը, որ պատմում է Լեռնային Ղարաբաղի Խաչմաչ գյուղի երկու ընկերների (մեկը հայ, մյուսը ազերի) բարեկամության մասին, ցուցադրվել է Իրանում, Լիբանանում, Իտալիայում, Հունաստանում եւ այլ երկրներում: Մասնակցել է Գոլդըն Գլոբի, Կաննի 69-րդ, Վենետիկի, Շանհայի եւ Սկանդինավիայի միջազգային կինոփառատոներին: Այս վերջինում արժանացել է «Լավագույն գեղարվեստական ֆիլմ» մրցանակին: Ֆիլմում ընդգրկված են ինչպես հայ, այնպես էլ հույն, իրանցի եւ լիտվացի դերասաններՙ Ալեքսանդր Խաչատրյան (Աբգարի դերում), Սանդրա Դայկուսատե-Պետրուլին (Աբգարի կորսված դստեր դերում) եւ Հոմայզուն Էրշադի (Իբրահիմի դերում): Միջոցառումը կազմակերպել է Արա Արազը ՙ մի շարք հայկական համայնքային կազմակերպությունների աջակցությամբ, արցախյան շարժման 30-րդ տարեդարձի առթիվ: Իր խոսքում նա շնորհակալություն է հայտնել այդ կազմակերպություններին եւ ներկայացրել է ֆիլմի ռեժիսորին, ով ներկա է գտնվել միջոցառմանը: Ավետիսյանն իր խոսքում նշել է, որ ֆիլմը շոշափում է համամարդկային արժեքներ հանդիսացող ընտանիքի եւ ընկերության թեմաները, իսկ ավարտը թողնված է հանդիսատեսի երեւակայությանն ու մեկնաբանմանը: Նարեկացի արվեստի կենտրոնի հիմնադիր Նարեկ Հարությունյանը թարգմանչի դերն է կատարել հարց ու պատասխանի բաժնում: Ջիվան Ավետիսյանը ծնվել է Խաչմաչում, բայց ընտանիքը Գյումրի է տեղափոխվել, երբ հայրը տեքստիլ ֆաբրիկայի տնօրեն է նշանակվել: Յոթ տարեկանում նա ականատես է եղել ավերիչ երկրաշարժին, որի ընթացքում մայրը վիրավորվել է: 1989-ին վերադարձել են Ղարաբաղ, որտեղ էլ քիչ անց պատերազմն է սկսվել ազերիների դեմ: «Այդ բոլորը խորը արմատներ թողեցին իմ ներաշխարհում», ասել է նա: Ավետիսյանն այժմ աշխատում է «Դարբաս դեպի երկնային արքայություն» ֆիլմի վրա: Իր նախորդ ֆիլմերն են «Խորտակված մանկությունը» եւ «Թեւանիկը», որոնք նույնպես արժանացել են միջազգային կինոքննադատների ուշադրությանը: «Վերջին բնակիչը» ֆիլմը նաեւ ցուցադրվել է Բոստոնում փետրվարի 17-ին: Հասույթը տրամադրվել է Ավետիսյանների նոր ֆիլմին: |
