1896-1930 ԹՎԵՐԻ ՀԻՇԱՐԺԱՆ ԻՐԵՐԸ ՄԵԿ ԳՐՔՈՒՄ Հ.Ծ. Հայերը սիրում են զանազան իրեր հավաքել: Ոմանք էլ իրենց հավաքածուները տարիներ անց նվիրում են թանգարաններին: Քչերը գիտեն, օրինակ, որ Կոնեկտիկուտում (ԱՄՆ) գործում է Էլիզաբեթ Թաշչյանիՙ ընկույզներին նվիրված յուրահատուկ թանգարանը: Իսկ եթե այդ առարկաները ինչ-որ ձեւով առնչվում են Հայոց ցեղասպանության հետ, առավել եւս դառնում են հիշարժան եւ սրբազան մասունքներ: Հասկանալի է, ուրեմն, այն հետաքրքրությունը, որ առաջացրել է ավստրալահայ Նուպար Նիք Պեզիկյանի վերջերս հրատարակած գրքույկըՙ «Armenian Relief Fundraising Memorabilia» խորագրով, որտեղ հեղինակը փորձել է ի մի բերել եւ ընթերցողներին ներկայացնել տարբեր երկրներում 1896-ից 1930 թվականներին հայ գաղթականներին օգնելու նպատակով ստեղծված հիշարժան առարկաներըՙ մեդալներ, կրծքանշաններ, դրոշմանիշեր, եւայլն: Նման իրեր դրամահավաքի նպատակով շրջանառության մեջ են դրվել Մ. Նահանգներում «Նիըր իսթ նպաստամացույց», Ավստրիայում «Հայ օգնության ֆոնդ», եւ Մեծ Բրիտանիայում «Հայ գաղթականների (լորդմերի) ֆոնդ» կազմակերպությունների կողմից: Պեզիկյանն իր գրքույկում նկարագրել է յուրաքանչյուր իր, ներկայացրել լուսանկարը եւ նշել թողարկման թվականը: Նա իր երախտագիտությունն է հայտնել Հայկական դրամագիտության եւ հնությունների ընկերությանը, դրոշմանիշերի հայկական ասոցիացիային եւ անհատ հավաքորդներին (օրինակՙ դոկտ. Լեւոն Սարյանին) անհրաժեշտ տեղեկություններ եւ լուսանկարներ տրամադրելու համար: Նա կոչ է արել նոր նյութեր տրամադրել իրեն այցելելով «www.victorybadges.com» կայքը (http://victorybadges.com/collectors-guides), հետագայում ավելի ընդարձակ ու լրացուցիչ մանրամասնություններով գիրքը վերահրատարակելու համար: |
