ՆՈՐ ՏԵՍՔ ՀԱՅԿԱԿԱՆ ԿՈՆՖԻԳՈՒՐԱՑԻԱՅԻՆ Հ.Ծ. «Բոստոնի կենտրոնում կա մի «ֆանտաստիկ եւ կրեատիվ» զբոսայգի, որտեղ տեղադրված է արվեստի հարափոփոխ մի աբստրակտ քանդակ, որն ապրող հիշողության մարմնացումն է»: Այսպես է «Ուոնդերլաստ Ամերիկանա» կազմակերպությունը նկարագրել Գրինվեյում գտնվող «Հայկական ժառանգության պարկը»: Պողպատից եւ ալյումինից պատրաստված այնտեղ գտնվող աբստրակտ կոնֆիգուրացիան, որ երկու մասի է բաժանված եւ խորհրդանշում է իր բնօրրանից արմատախիլ եղած եւ Մասաչուսեթսի նոր հանգրվանի պայմաններին հարմարված հայկական համայնքը, ամեն տարի ձեւափոխվում է նոր իմաստ վերագրելով արվեստի այդ բազմակողմ երկրաչափական կառույցին: Ձեւափոխմանն առընթեր ամբողջ տարվա ընթացքում տարբեր միջոցառումներ են տեղի ունենում այնտեղՙ ուշադրությունը գրավելով այգում հանգստացող կամ շրջագայող հայ թե օտարազգի մարդկանց: Այս տարի ձեւափոխումը կատարվելու է ապրիլի 8-ից 15-ը ընկած ժամանակահատվածում, որից հետո ապրիլի 21-ին եւ 22-ին տեղի են ունենալու Հայոց ցեղասպանության կոմիտեի «Հիշատակության» արարողությունն ու «Քայլարշավն ընդդեմ ցեղասպանությունների» միջոցառումը: Հանրային արվեստի տոնախմբությունը նախատեսված է մայիսի 5-ին անցկացնել, իսկ «Ելակի լուսնի ներքո» նոր միջոցառումըՙ հունիսի 28-ին: Սեպտեմբերի 16-ը վերապահված է երաժշտության հնչյունների ներքո հաճելի երեկո անցկացնելու ընտանիքի անդամների եւ ընկերների հետ: Եվ այսպես շարունակ մինչեւ տարեվերջ այգու այցելուները ժամանակ չեն ունենալու ձանձրանալու, հավաստիացնում է «Արմինյն Միրոր-Սփեքթեյթր» շաբաթաթերթը: | 
