ԱՆՁՆԱԳՐԵՐԻ ՑՈՒՑԱՀԱՆԴԵՍՈՒՄ ՆԱԵՎ ՀԱՅԿԱԿԱՆ ՆՅՈՒԹԵՐ Հ.Ծ. Քեյմբրիջում (Մասաչուսեթսի նահանգ) գտնվող Մ. Նահանգների հնագույն համալսարանի (հիմնված 1636-ին) Հոութն գրադարանում ապրիլի 30-ից օգոստոսի 18-ը գործելու է «Անձնագրեր: Անցումային շրջանի կյանքեր» խորագիրը կրող ցուցահանդեսը, տեղեկացնում է «Արմինյն Միրոր-Սփեքթեյթր» շաբաթաթերթը: Այն եզակի հնարավորություն է տալու այցելուներին խորհրդածելու պատմության ընթացքում տեղի ունեցած զանգվածային միգրացիայի խնդիրների մասին, մանավանդ հաշվի առնելով վերջին շրջանի փախստականների տեղաշարժերը մի երկրից մյուսը: Ներկայացվել են հնագույն անձնագրեր, վիզայի դիմումներ եւ ներգաղթի հետ կապված այլ փաստաթղթեր: Հատուկ բաժնում ներկայացվել են նաեւ Հայոց ցեղասպանության, տարագրության եւ գաղթի հետ կապված վավերագրեր: Նյութերը հավաքվել են Հոութն, Ուայտներ, Շլեսինգեր (Ռադկլիֆ ինստիտուտ), Բեյքր (Հարվարդի բիզնես դպրոցի) եւ Հարվարդ-Ենչինգ գրադարաններից եւ Հարվարդ համալսարանի արխիվներից: Ցուցանմուշների մեջ են 1857-ին Ջորջ Ֆրենսիս Տրեյնին տրված անձնագիրը, որը պնդում էր, որ նախատիպն է եղել Ժյուլ Վեռնի «80 օր աշխարհի շուրջը» վեպի հերոս Ֆիլիաս Ֆոգի, Տրոցկու արտաքսման փաստաթղթերը, աֆրո-ամերիկացի ակտիվիստՙ Շիրլի Դյու Բուայի անձնագիրն ու նամակները, ԱՄՆ-ի նախագահ Ուորեն Հարդինգի 1922-ին ուղարկված հեռագիրը դոկտ. Ջեյմս Բարտոնին, որտեղ հանձնարարվում էր Մերձավոր Արեւելքում կազմակերպել նպաստընկալական գործունեություն, խորհրդային ժամանակներում բիթլիսցի Հովհաննես Որբերյանին (նաեւ ճանաչված որպես Հայրապետյան) տրված անձնագիրը, Սվազից (Սեբաստիա) 18-ամյա Շուշան Մարտիկյանին եւ Լիբանանում ծնված նրա մեկուկես տարեկան որդուՙ Մարտիրոսի ժամանակավոր անձնագիրը, եւ այլն: Ցուցահանդեսի կազմակերպիչներից Լուկաս Մերտեհիկյանը (Մարտիկյան) բացատրել է, որ Շուշանը եղել է իր մեծ տատը եւ անձնագրային փաստաթուղթը միայն վերջերս է հայտնաբերվել հոր կողմիցՙ վերոհիշյալ Մարտիրոսի մահվանից հետո (2013-ին): Ցուցահանդեսի կազմակերպչական աշխատանքները ղեկավարել է Հոութն գրադարանի հասարակական եւ գիտական ծրագրերի տնօրեն Աննա-Մարիա Էզեն: | 
