ԱՆԱՀԻՏ ՊՈԶԻԿՅԱՆ-ԴԱՐԲԻՆՅԱՆ Հ.Ծ. Շաբաթվա սկզբին 90 տարեկանում վախճանվել է «Ազգ» թերթի բարեկամների շրջանակից գրող, մանկավարժ, թարգմանիչ եւ բանաստեղծ Անահիտ Պոզիկյան-Դարբինյանը , որ ժամանակ առ ժամանակ հետաքրքրական հոդվածներով հանդես էր գալիս թերթի էջերում: Ծնվել էր 1928-ին Ալեքսանդրետում: Հայրենիք էր վերադարձել 1946-ին: Մոտ 30 տարի Երեւանի Չարենցի անվան անգլիական թեքումով դպրոցի ուսմասվարն է եղել: Մոտ 6 տարի որպես ավագ դասախոս աշխատել է նաեւ Բրյուսովի անվան օտար լեզուների ինստիտուտում: Ունի հրատարակված գործեր: Հայերենից անգլերեն է թարգմանել Հովհ. Թումանյանի եւ Ավ. Իսահակյանի հեքիաթները: Մասնակցել է նաեւ ցեղասպանագետ եւ բանահավաք, բ.գ. դոկտոր Վերժինե Սվազլյանի «Հայոց ցեղասպանություն: Ականատես վերապրողների վկայություններ» ծավալուն հատորի անգլերեն թարգմանությանը: 2001-ին լույս է ընծայել «Ալլո, Հայաստան» բանաստեղծությունների գիրքը, որտեղ ամփոփված են նրա հայրենասիրական ոգու պոռթկումները: Մտավորականի նրա տիպար օրինակը վառ կմնա նրան ճանաչողների սրտերում ու հոգիներում: «Ազգ»ը ցավակցում է նրա հարազատներին Աստծուց հայցելով համբերություն եւ մխիթարություն նրանց եւ մյուս բոլոր սգակիրներին: | 
