ՀԱՅԱՍՏԱՆԻ ՏԱՐԲԵՐ ԳՅՈՒՂԵՐՈՒՄ ԸՆԹԱՑՔԻ ՄԵՋ Է ԷՆԵՐԳԱԽՆԱՅՈՂ ՀԱՄԱԿԱՐԳԻ ՆԵՐԴՐՈՒՄԸ ՎիվաՍել-ՄՏՍ-ը եւ Վայրի բնության եւ մշակութային արժեքների պահպանման հիմնադրամը (FPWC), շարունակում են գործակցությունըՙ էկոգյուղերի ցանցի զարգացման ուղղությամբ: Ծրագրի թիրախում Հայաստանի հեռավոր գյուղերն են: Ենթակառուցվածքների զարգացումն իրականացվում է մի քանի փուլով: Ներդրվում են էներգախնայող համակարգեր, որոնց գործարկումը շահավետ է մի քանի առումով. թեթեւանում է համայնքի ֆինանսական բեռը, համադրվում են բնապահպանական եւ բնական ռեսուրսների կայուն օգտագործման բաղադրիչները, ստեղծվում է մաքուր շրջակա միջավայր: Վայոց ձորի մարզի Քարագլուխ գյուղի բնակիչներն արդեն հասցրել են զգալ համակարգի արդյունավետությունը: LED եւ սովորական լուսարձակների սպառած էներգիան համեմատել է նաեւ Եղեգիս համայնքի ղեկավար Արթուր Ստեփանյանըՙ արձանագրելով ե՛ւ սպառած էներգիայի, ե՛ւ ֆինանսական միջոցների խնայողություն: Արտաքին լուսավորության ժամանակակից լուծումը, գործակցող կողմերի շնորհիվ, այս գյուղ է մտել նախորդ ձմռանը: 2017 թվականին լուսավորվել են գյուղի հիմնական փողոցները` ներառելով 1872մ երկարությամբ տարածք: Տեղակայվել է 52 LED լուսարձակ: Ծրագրի շարունակությամբ ընթացքում են երկրորդական փողոցների լուսավորության աշխատանքները: Անհրաժեշտ չափագրումներից եւ հողային աշխատանքներից հետո տեղակայվում են հենասյուները: Նոր համակարգի ներդրումը փոխում է դրա պահպանման նկատմամբ տեղացիների վերաբերմունքը. եղածն աչքի լույսի պես պահպանելու գիտակցությունն այստեղ դառնում է արժեհամակարգ: Քարագլուխ գյուղի բնակիչները կարեւոր ձեռքբերում են համարում տնտեսված միջոցներն ու քաղաքակիրթ աշխարհին հատուկ ենթակառուցվածքների առկայությունը: Արտաքին լուսավորությունը, ի դեպ, նաեւ վայրի կենդանիներից պաշտպանվելու հնարավորություն է տվել: Մինչեւ տարեվերջ, գյուղում կավարտվի ծրագրի երկրորդ փուլը: | 
