ԿԱՆԳՆԵՑՐԵ՛Ք ՏԽՈՒՐ ՎԻՃԱԿԱԳՐՈՒԹՅՈՒՆԸ Մ.Խ. Այս շաբաթ Որոտան-Խնձորեսկ ավտոճանապարհին տեղի ունեցած ողբերգական վթարի հետեւանքով զոհվել է չորս զինծառայող, ձորը գլորված զինվորական բեռնատարի շատ զինծառայողներ վիրավորվել են: Այս փաստին հնրավոր չէ անդրադարձ չանել` վերլուծաբան լինես, թե ՀՀ սովորական քաղաքացի: Սա պարզապես խայտառակություն է` խաղաղ պայմաններում բանակում շարունակվող մահերի ֆոնին` այս դեպքն ամենցնցողն էր վերջին շրջանում, որը ոչ մի կերպ ծածկադմփոց անել չի ստացվի: Կատարվածի տեխնիկական պատասխանատուներին ու հենց հրամանատարներին պետք է այնպիսի պատասխանատվության ենթարկվել, որ մեր բանակի ղեկավար կազմում վերջապես արթնանան քնից, ու զուտ խոստումներ շռայլելուց եւ տեսախցիկների առաջ պոզա ընդունելուց բացի` ամեն ինչի համար պատասխան տալու գիտակցումով ծառայեն: Պարոն Տոնոյան, ի՞նչ է կատարվում, ինչո՞ւ են մեր զինվորներն առանց կռվի զոհվում: Առժամանակ մի կողմ թողեք միջազգային հարթակների դիվանագիտական աշխատանքը եւ խորությամբ զբաղվեք բանակի ներքին խնդիրները կարգավորելով` առանց մեր զինվորներին դարձնելու նոր իշխանության սոսկ քարոզչական հետնապատկեր: Լրջորեն ու խորքից ամեն բան փոխեք բանակում, կանգնեցրեք տխուր վիճակագրությունը, ոչ թե միայն մակերեսի առաջնապատկերը գունավորեք: Գոնե վերջին դեպքի հետ կապված արագ վերանայեք մոտեցումը` հնարավոր չէ՞ փորձառու վարորդների նստեցնել զինվորների տեղափոխող մեքենաների ղեկին, էս էլ որ դեպքն է` մեր զինվոր երեխեքը զոհվում են խաղաղ պայմաններում: |
