«ՀԱՅԿԱԿԱՆ ՄԱՖԻԱ» ԱՐՏԱՀԱՅՏՈՒԹՅՈՒՆԻՑ ԽԱՎԻԱՐԻ ՈՒ ՌԱՔՔԻԻ ՀՈՏ Է ԳԱԼԻՍ» ԱՆԱՀԻՏ ՀՈՎՍԵՓՅԱՆ Գերմանական լրատվադաշտում օրեր շարունակ շրջանառվող «հայկական մաֆիա» ձեւակերպման առիթով իր վրդովմունքն է հայտնում Գերմանահայոց կենտրոնական խորհրդի (ԳԿԽ) ատենապետ Շավարշ Հովասափյանըՙ «Ալգեմայնե ցայթունգի» երեկ հրատարակված հոդվածումՙ դրանք որակելով «վարկաբեկիչ»: («Ազգ»-ի նախորդ համարում «Դիվանագետի համար լռությունը... ոսկի՞» ծավալուն հոդվածով անդրադարձել ենք աղմկահարույց այս թեմային, որին ՀՀ արտգործնախարարությունը դեռեւս չի արձագանքել: Տեղի սղության պատճառով առայժմ բավարավում ենք ստորեւ ներկայացվող այս համառոտ լրացմամբ): Շաբաթասկզբին ԳԿԽ- ի տարածած հաղորդագրությունից հետո, տեղական թերթն անհրաժեշտ է համարել կապվել հայկական կառույցի ղեկավարի հետ, ներկայացնել նրա կարծիքը: «Հայկական մաֆիա՞. արտահայտվելիս պիտի զգույշ լինել», նկատել է տալիս գերմանահայկական ամենամեծ կառույցներից մեկիՙ 1968-ին հիմնադրված ԳԿԽ-ի 80-ամյա ղեկավարը, որը 1963-ին Իրանից գաղթելով Գերմանիա, ատամնաբուժություն է սովորել, սեփական բուժարանը հիմնել, ամուսնացել է գերմանուհու հետ, 1982-ին ստացել ԳԴՀ քաղաքացիություն, եւ համոզված է, թե նոյեմբերի սկզբին «Շպիգելի» եւ Mitteldeutsche Rundfunk - ի հրապարակումների նպատակը Գերմանիայում միմյանց հետ խաղաղ գոյակցող գերմանացի եւ հայ հանրության դեմ արշավ ծավալելն է, բարեկամությունը խաթարելը, հայությանը վարկաբեկելը: Ֆրայբուրգում տեղակայված ձախակողմյան այլընտրանքային «Դրայէքլանդ» ռադիոն, որ կամրջում է երեք երկրներՙ Գերմանիան, Շվեյցարիան, Ֆրանսիան (Radio Dreyeckland) երեկ առավոտյան նմանապես եթեր էր տրամադրել Շավարշ Հովասափյանինՙ իր կողմից կարծիք հայտնելով, թե չափազանցված է համարում իր գործընկերներիՙ ARD-ի, Focus- ի, Spiegel- ի, Mitteldeutsche Rundfunk - ի բնութագրումներըՙ «իրավական պետությանը վտանգ է սպառնում», «հայկական մաֆիանՙ տեսադաշտում», «հայկական կլաններ» եւ նմանատիպ արտահայտությունների կիրառումը: 7 րոպեն գերազանցող ռադիոհաղորդման մեջ ընդգծվում է Հովասափյանի այն պնդումը, թե հանցավոր արարքները ներկայացնելը եւ դրանք էթնիկ մի խմբի վերագրելըՙ հայկական անվանելը «խտրականության դրսեւորում» է, վարկաբեկիչ: Շավարշ Հովասափյանը նկատել է տալիս, թե ներկայացվածը լրագրողական աշխատանք չէ, ապացույցների բացակայությամբ հրապարակված նյութը լուսաբանելու նպատակից հեռանում է, եւ իր կարծիքով, «դրանից ավելի շուտ խավիարի եւ ռաքքիի հոտ է գալիս»: Մեկնաբանի խնդրանքով ԳԿԽ ատենապետը բացատրում է վերջին պատկերավոր արտահայտությունների այլաբանությունըՙ Ադրբեջանի եւ Թուրքիայի ցանկությունն է հայկական համայնքի հզորացման ընթացքի թուլացումը, ՀՀ դեսպանի ակտիվ աշխատանքի արգասիքը համարվող հայ- գերմանական վերընթաց, զարգացող հարաբերությունների խաթարումը: «Ապացույցներ ունե՞ք», ռադիոմեկնաբանի հարցին ատենապետ Հովասափյանը բացասական պատասխան է տալիսՙ սա ենթադրություն է, ասում է նա: Այնուհետեւ ռադիոմեկնաբանը ամփոփում է հաղորդումըՙ ներկայացնելով ԳԴՀ իրավապահ, հանցավորության դեմ պայքարի կոչված համաեվրոպական մարմինների հետաքննության 0 արդյունքը, ու փորձում համադրել փաստերը. մասնավորապես ուշագրավ է համարում այն, որ այդպիսի արդյունքի պարագայում այսչա՛փ կարեւորվել է հայկական անունով կնքել տալ հանցավոր մի խմբի, որի անդամները հաշվառված են որպես «ռուսական, եվրասիական քրեական կազմակերպված հանցախմբի անդամներ», ինչպես իրենց հարցմանն ի պատասխան իրազեկ են դարձել Գերմանիայի դաշնային քրեական վարչության գրավոր արձագանքից: |
