ԵԹԵ ԽՈՐԵՆԸ ՎԱՐԴԱՊԵՏ Է, «ԱՆԱՍՏՎԱԾԸ» ՄՈՄ ԷԼ ԿՎԱՌԻ ԳԵՎՈՐԳ ԳՅՈՒԼՈՒՄՅԱՆ Այս օրերին Հայ առաքելական եկեղեցու յուրաքանչյուր անդամ պետք է հնարավորինս զգոն լինիՙ եկեղեցու դեմ ամեն մի դավադրություն կանխելու: Ցավոք սրտի, այդպես չի մտածում Հայ Առաքելական եկեղեցու Հունաստանի թեմի Առաջնորդական տեղապահ Խորեն վարդապետ Առաքելյանը: Ընդհանրապես, այս մարդն ի սկզբանե հայտնի է եղել իր սկանդալային, հայ եկեղեցականին ոչ հարիր պահվածքով, խտրականությամբ եւ մասամբ նորին: Օրերս նա հրահրել է հերթական, ավելի մասշտաբային, կասեիՙ միջպետական եւ միջեկեղեցական սկանդալ: Իր ֆեյսբուքյան էջում տեղադրելով Հունաստանի վարչապետ Ալեքսիս Ցիպրինիՙ Կոստանդնուպոլսի հարեւանությամբ գտնվող Խալքիս կղզու հունական եկեղեցում լուսանկարված մոմավառության տեսարանը, Խորեն վարդապետը հունարեն լեզվով գրել է. «Անաստվածը մոմ էլ է վառում»: Ժողովրդական առածն ասում էՙ «Գայլի գլխին ավետարան են կարդում, ասում էՙ արագացրեք, հոտը սարն անցավ» : Ինչպես հիշյալ գայլը, այնպես էլ սույն հոգեւորականը, երբեք չի խրատվում իր շուրջ հասունացած աղմուկ-աղաղակից: Հիմա արդեն, այս արարքի համար, Հունաստանից բողոքի նոտա կուղղվի ՀՀ արտգործնախարարությանըՙ արգահատելի պատճառով: Սփյուռքում գտնվող հոգեւորականի առաջին անելիքը հայպահպանությամբ ու հոգեւոր ծառայությամբ զբաղվելն է: Սփյուռքում գտնվող հոգեւորականի խնդիրը չէՙ տվյալ երկրի վարչապետը աստվածապա՞շտ է, թե՞ անաստված: Մեր հունահայ բարեկամները տեղեկացրին, որ վարդապետի արարքն ուղղակի տհաճ անակնկալ է մատուցել Հունաստանի վարչապետի գրասենյակին ու անձամբ իրենՙ վարչապետին: Նույն աղբյուրի փոխանցմամբ ՙ հունահայ համայնքիՙ Ս. Էջմիածնի Մայր աթոռին մոտ կանգնած շրջանակներն իրենց անհանգստությունն ու դժգոհությունն են հայտնել Ամենայն հայոց կաթողիկոս Գարեգին Բ Հայրապետինՙ անվստահություն հայտնելով Խորեն վարդապետին եւ պահանջելով նրա հեռացումը թեմից: Հույս ենք հայտնում, որ Հայոց Հայրապետը, գոնե այս անգամ, խիստ կդատի Խորեն վարդապետին եւ նրան նվազագույնը կհեռացնի հունահայոց թեմից, որովհետեւ, ինչպես տեսնում ենք, այդ մարդը քայլող անպատվություն է Հայ առաքելական եկեղեցու եւ վտանգՙ հայ-հունական կրոնական-պետական հարաբերությունների համար: Սա արդեն Հայ առաքելական եկեղեցու պատվի հարցն է, մանավանդ հիմա, երբ չորս կողմից դավադիր նշանառության տակ է առնված մեր ազգային եկեղեցին. վարդապետ կոչված Խորենի արարքն ուզենք, թե չուզենք, վայրահաչելու առիթ է տալու բոլոր նրանց, ովքեր առիթը չեն կորցնումՙ մեր եկեղեցուն քննադատելու: | 
