ՍՄԱՐԹՖՈՆՆԵՐ` ՔԱՇԱԹԱՂԻ ԴՊՐՈՑՆԵՐԻ ԵՐԵԽԱՆԵՐԻՆ Առողջապահության համաշխարհային կազմակերպությունը հայտարարեց, որ նոր կորոնավիրուսի տարածումը հասել է պանդեմիայի մակարդակի, քանի որ վիրուսի աշխարհագրական սահմանները ներառում են աշխարհի երկրների մեծ մասը: 
Չնայած ըստ պաշտոնական տվյալների Արցախում չեն գրանցվել վարակի դեպքեր, այնուամենայնիվ հետագա վարակի տարածումից խուսափելու համար, ինչպես շատ երկրներում այնպես էլ Արցախում, փակվեցին կրթական հաստատությունները: Ուսուցիչները արագ ձեռնարկեցին տարբեր միջոցներ աշակերտներին ներգրավելու հեռավար ուսուցման մեջ: Օգատագործվեցին տարբեր կրթական հարթակներ: Բայց ոչ բոլոր աշակերտներն էին կարողանում օգտվել հեռահար ուսուցումից: 
Եվ ահա Բերձորի Վահան Թեքեյանի դպրոցումՙ «Դասավանդիր Հայաստան» ծրագրով աշխատող անգլերենի ուսուցչուհի Լիդա Նալբանդյանը, հանդես եկավ հրաշալի նախաձեռնությամբ, առցանց դիմեց ծնողներին, երեխաներին, ովքեր չէին կարողանում մասնակցել հեռավար դասընթացին: Միաժամանակ նա դիմեց «Հայրենիք» զարգացման հիմնադրամին: Արձագանքը երկար սպասեցնել չտվեց: 
«Հայրենիք» զարգացման հիմնադրամի նախագահ գեներալ մայոր Արթուր Վանեցյանի ջանքերով Քաշաթաղի դպրոցականները (Սուս համայնք, Բերձորի Վահան Զատիկյանի հ 2 եւ Վահան Թեքեյանի հ 1) ստացան հեռախոսներ եւ անսահմանափակ ինտերնետ կապ: 
Դպրոցից ընդգրկված էին 24 աշակերտներ, նվերները բաժանեց հիմնադրամի տնօրեն Խաչիկ Գալստյանը։ Կար այլ անակնկալ եւս. դպրոցի տնօրենները ստացան մեկական նեթբուքներ: 
Նույն օրը ժամը 15:00 երեխաները zoom ծրագրով միացան Արթուր Վանեցյանի հետ եւ իրականացրեցին արիության դասՙ նվիրված ապրիլյան պատերազմի զոհերին: 
Շնորհակալություն ենք հայտնում բարեգործության համար եւ կարծում ենք, որ կգտնվեն բարի մարդիկ, ովքեր կշարունակեն հանդես գալ նման նախաձեռնությամբ, քանզի գիտենք, որ ոչ բոլոր աշակերտներն են կարողանում մասնակցել հեռավար դասերին: | 
