ԵՄ-ՈՒՄ ԻՆՏԵՆՍԻՎ ԹԵՐԱՊԻԱՅԻ ԴԵՂԱՄԻՋՈՑՆԵՐԸ ՍՊԱՌՎՈՒՄ ԵՆ Ա․ Քեշիշյան Եվրոհանձնաժողովը դեղորայք արտադրողներին ուղղված նամակում տագնապ է հնչեցնում․ առաջիկա օրերին եվրոպական երկրների հիվանդանոցներում կարող են սպառվել Covid-19-ից բուժվող ծանր հիվանդների համար նախատեսված դեղամիջոցները, հաղորդում է գերմանական Die Welt հրատարակությունը։ Խոսքը ցավազրկիչ պատրաստուկների, վերակենդանացման դեղամիջոցների, մկանային ներարկման դեղորայքի եւ հակաբիոտիկների մասին է։ Ինչպես նշվում է նամակում, ավելի վաղ ԵՄ մի քանի պետություններ Դեղամիջոցների եվրոպական գործակալությանը հայտնել էին, որ կենսականորեն անհրաժեշտ դեղորայքի առկա պաշարները իրենց կբավականացնեն ընդամենը մեկ շաբաթ։ Եվրոհանձնաժողովի գրությունից նաեւ պարզ է դառնում, որ եվրոպական որոշ երկրներում արդեն իսկ սպառվել են ծանր հիվանդների բուժման համար նախատեսված դեղամիջոցները։ Մասնավորապես դա վերաբերում է Իսպանիային, Ֆրանսիային, Շվեդիային, Ֆինլանդիային եւ Ավստրիային։ Լրագրողական հետաքննությունների բյուրոյի ստացած տեղեկությունների համաձայն, դեղորայքի պակասը հանգեցնում է նրան, որ Covid-19-ով ծանր հիվանդների բուժման ժամանակ կլինիկաները ստիպված են լինում դիմել դեռեւս իրենց տրամադրության տակ գտնվող ուրիշ դեղամիջոցների օգտագործմանը, որոնց մի մասը ավելի ուժեղ ազդեցություն է գործում։ Դա կարող է զգալիորեն վատացնել բուժման որակը։ Մասնավորապես հարկավոր է զգուշանալ տարեց հիվանդների թվի աճից, որոնց բուժման ընթացքում նարկոզի դեղամիջոցների օգտագործումը հարուցում է ուղեղի աշխատանքի լուրջ խախտումներ, որոնք, ի թիվս այլ բաների, կարող են խաթարել գիտակցությունը, շարժունակությունը եւ հիշողությունը։ | 
