«ԹԵՎԵՐ ԵՄ ՏԵՍՆՈՒՄ» ԲԱԼԼԱԴԸՙ ՖԻԼՄԻ ՎԵՐԱԾՎԱԾ Հ. ԾՈՒԼԻԿՅԱՆ, (Միրոր-Սփեքթեյթր) Դետրոյթցի արվեստագետ Կեննի Ուաթսոնի ձայնագրած սիրատենչ սիմֆոնիկ բալլադը, որ «Հայկական եռերգություն» խորագրով մրցանակակիր վավերագրական ֆիլմի մաս է կազմում, առանձին ֆիլմի է վերածվել եւ թողարկվել վերջերս «Apple Music», «Tunes» եւ «Spotify» երաժշտական հարթակներում: Ֆիլմը, որ թողարկվել է անգլերենից բացի, ֆրանսերեն, ռուսերեն, իսպաներեն, արաբերեն, արեւելահայերեն ենթախորագրերով, պատմում է ամերիկահայ կոմպոզիտոր Դեն Եսյանի անցած ուղու մասին: «Թեւեր եմ տեսնում» ստեղծագործությունը Եսյանը գրել է իր գործընկերՙ Դեյվիդ Բարրետի համագործակցությամբ: Վերջինս ճանաչում է ձեռք բերել հատկապես «NCAA-ի տղամարդկանց բասկետբոլի առաջնության» «Մի լուսավոր պահ» հիմնը հորինելու համար: «Թեւեր եմ տեսնում» երգը հուշամատյան է ատելության հողի վրա գործված դաժանությունների բոլոր զոհերին նվիրված: Մինչ Հայոց ցեղասպանությունը տեղի ունեցավ ավելի քան հարյուր տարի առաջ, հինավուրց այն հարցը, թե ինչու մարդիկ վնասում են իրենցից տարբեր այլ մարդկանց, այսօր էլ շարունակում է այժմեական մնալ: Հույս ունեմ, որ երաժշտության միջոցով կկարողանամ որոշ չափով մեղմել մարդկանց ցավը», բացատրում է Եսյանը, որ «Եսյան երաժշտական ստուդիաների (Դետրոյթում, Լոս Անջելեսում, Նյու Յորքում եւ Համբուրգում, Գերմանիա) սեփականատերն է: 2018-ին նրան ներառել են «Adcraft» գովազդային արդյունաբերության «Համբավավորների ճեմասրահում»ՙ այդ բնագավառում իր ունեցած անգնահատելի ավանդի առ ի գնահատական: Եսյանի ստուդիաները երաժշտական հեռուստահոլովակներ են ստեղծում «Յունայթեդ Արտիստ», «Ֆորդ», «Մկդոնալդսի», «Դիսնեյի», «Տոյոտայի» եւ այլ ընկերությունների համար: |
