ՀԱԿԱՀԱՅԿԱԿԱՆ ՑՈՒՅՑԵՐ ՍՏԱՄԲՈՒԼՈՒՄ Հ.Ծ. Մինչ աշխարհի չորս ծագերում սփյուռքահայությունը միասնական շարքերով իր զորակցությունն է հայտնում Արցախին, Ստամբուլից «Նոր Մարմարա» եւ «Ժամանակ» պարբերականները տեղեկացնում են, որ Թուրքիայի հայկական համայնքի եւ այնտեղ բնակվող հայաստանցի քաղաքացիների դեմ թշնամանքն ու ատելությունը դարձյալ գլուխ են բարձրացրել: Թուրքական եւ ադրբեջանական դրոշներ ծածանող, շչակները միացրած ավտոշարասյունը ցույց է կազմակերպել Գումքափույում գտնվող հայկական պատրիարքարանի առաջՙ «որոշակի ուղերձ» հղելով հայ համայնքի ներկայացուցիչներին, որոնք ապրում են այդ տարածքի հարեւանությամբ: Չնայած նույն օրը AKP կուսակցությունից Օմեր Չելիքի հնչեցրած խոսքերին, որ անընդունելի է նման սպառնալիքներ ուղղել հայկական համայնքին, ցույցերը շարունակվել են ընթանալ նաեւ այլ վայրերում, մասնավորապես Ստամբուլի Բայազետ հրապարակում եւ Բեշիկթաշի հարեւանությամբ գտնվող Ադրբեջանի հյուպատոսարանի առաջ: Բայազետ հրապարակում թուրք եւ ազերի քաղաքացիներ, իրենց համապատասխան երկրների ազգային հիմնի հնչյունները լսելուց հետո, թշնամական խոսքեր են հղել հայերի դեմ: Ցույցը կազմակերպողներից Ջան Կիթայը հոխորտացել է, որ զորակցություն են հայտնում «Ադրբեջանի փառավոր բանակին»: Նա նշել է, որ «Հայաստանը ցույց տվեց, որ ահաբեկչական երկիր էՙ հարձակվելով խաղաղ քաղաքացիների վրա»: Բեշիկթաշում հեծանվորդներ միացել են ցույցինՙ «անեծքներ թափելով հայերի հասցեին»: Հայազգի պատգամավոր Կարո Փայլանը հարձակման թիրախ է դարձել թերթերում, հատկապես ծայրահեղ աջակողմյան ASAM (Եվրասիական մարտավարական ուսումնասիրություների կենտրոն) կազմակերպության կողմից: Փայլանը հակադարձել է, որ ինքը խաղաղության կողմնակից է եւ դատապարտել է կառավարությանը հակամարտությանը բացահայտ զինվորական միջամտություն ցուցաբերելու համար: Նա նաեւ նշել է, որ ատելություն սերմանող ներկա մթնոլորտում հայերը ապահով չեն զգում իրենց: «Պատերազմում հաղթողներ, իսկ խաղաղ ժամանակներումՙ պարտվողներ չեն լինում», եզրափակել է նա: |
