Տեղադրվել է` 2021-04-01 23:29:49 (GMT +04:00)

Ընթերցված է` 1078, Տպվել է` 5, Ուղարկվել է էլ.փոստով` 0

ՀԱՅՏԱՐԱՐՈՒԹՅՈՒՆ

ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹՅԱՆ ԳԵՐԱԳՈՒՅՆ ԽՈՐՀՈՒՐԴ, Բոստոն, ԱՄՆ

Հայաստանի իշխանությունների ձախավեր դիվանագիտությունը կարող է վտանգել նախագահ Բայդենի կողմից Ցեղասպանության ճանաչումը

Անցյալում հայ ժողովուրդը երկիցս ականատես էր եղել դիվանագիտական մի վրիպումի եւ այսօր ազգովին գտնվում է միեւնույն վտանգի առջեւ:

Ժամանակակից պատմության մեջ ամերիկյան իշխանությունները երկու անգամ շատ մոտ էին գտնվում Հայոց ցեղասպանությունը ճանաչելուն, սակայն Թուրքիայի դիվանագիտական սադրանքները ձախողեցրին այն. առաջինը պատահեց «Ֆուտբոլային դիվանագիտության» օրերին, երբ նախագահներ Սերժ Սարգսյանի եւ Աբդուլա Գյուլի միջեւ բանակցություններ էին ընթանում, իսկ երկրորդըՙ Ցյուրիխում, Պրոտոկոլների ստորագրության ժամանակ, որին ներկա էր նաեւ պետքարտուղար Հիլարի Քլինտոնը:

Այդ երկու դեպքերի ժամանակ թուրքական իշխանությունները օգտագործեցին այն պատրվակը, թե կողմերը բանակցության մեջ են գտնվում, հետեւաբար երրորդ կողմի ներգրավումը կարող է վտանգել գործընթացը:

Այսօր դարձյալ գտնվում ենք միեւնույն կացության առջեւ եւ մտավախություն ունենք, որ Հայաստանի իշխանությունների սխալ դիրքորոշումը առիթ կտա թուրքական կողմին միեւնույն վտանգավոր պատրվակը օգտագործելու:

GZero կայքէջից տեղեկանում ենք, որ Սպիտակ տան աղբյուրները ամերիկյան հայտնի վերլուծաբան Իան Բրեմենին (Ian Bremmen) հայտնել են, որ ապրիլին նախագահ Բայդենի վարչությունը ճանաչելու է Հայոց ցեղասպանությունը, որը կազմակերպվել էր օսմանյան կառավարության կողմից, Առաջին աշխարհամարտի տարիներին:

Արդարեւ, քաղաքական հարգված վերլուծաբան Յան Բրեմերը, Eurasia Consulting Group-ից, GZero-ի մարտի 22-ի համարում գրում է. «Մեծ նորությունն այն է, որ Էրդողանը առաջիկայում ստիպված է դիմագրավել դիվանագիտական մի այլ մարտահրավեր Մ. Նահանգների կողմից. նախագահ Բայդենը ճանաչելու է 1915 թ.ի հայոց սպանդը որպես ցեղասպանություն»:

Այդպիսով, նախագահ Բայդենի ճանաչումը հանդիսանալու է լրացումն ու ամբողջացումը 2019 թ.ին Մ. Նահանգների օրենսդիր զույգ մարմինների կողմից մեծամասնության ձայնով ընդունված ճանաչման բանաձեւի:

Սակայն, մյուս կողմից, հենց այս ճակատագրական հանգրվանին վարանում է նկատվում Հայաստանի իշխանությունների կողմից, վարանումՙ որը կարող է համազոր լինել դիվանագիտական ձախավեր քայլի:

Համայն հայությունը այսօր գտնվում է ահազանգային վիճակումՙ մտահոգվելով, որ Հայաստանի կառավարությունը կարող է դարձյալ ընկնել Թուրքիայի լարած թակարդում եւ կորցնել պատմական թանկագին մի առիթ:

Արդարեւ, մարտի 23-ին Հանրային հեռուստատեսության զրուցավար Պետրոս Ղազարյանը հարցազրույց ունեցավ ՀՀ Անվտանգության խորհրդի քարտուղար Արմեն Գրիգորյանի հետ: Պ. Ղազարյանի ուղղակի հարցմանը, թե Թուրքիային որպես թշնամի պետությո՞ւն պիտի ճանաչել, Ա. Գրիգորյանը պատասխանեց, որ «եթե մենք գնում ենք տարածաշրջանի ապաշրջափակմանը, ապա մեր մոտեցումներում որոշակի շտկումներ պետք է լինեն, եւ այդ ուղղությամբ աշխատանքներ գնում են»: Շարունակելով իր հարցադրումը, թե Թուրքիան այլեւս թշնամի պետություն չէ՞, ԱԽ քարտուղարն ասաց. «Միանշանակ պնդել, թե որեւիցե վտանգ չի գալիս Թուրքիայիցՙ սխալ կլինի, բայց ընդհանուր տարածաշրջանում ընթացող գործողությունները այլ հնարավորություններ են տալիս»:

Այս հաստատումները, որոնք փաստորեն կատարվում են պաշտոնական աղբյուրի կողմից, ցնցել են Հայաստանի քաղաքական շրջանակները եւ բազմաթիվ խմբավորումներ արդեն ահազանգ են հնչեցրել գործի անցնելուՙ խուսափելու համար վերահաս վտանգից:

Վերջերս «Ազգ»ում հրապարակված մի լուր վրիպել էր քաղաքական շրջանակների ուշադրությունից: Սակայն այս վերջին զարգացումների լույսի ներքո չափազանց նշանակալից է դառնում այդ հաղորդագրությունը: Դա վերաբերում էր նախկին ֆրանսահպատակ Սամսոն Էոզարարատի Երեւան կատարած այցելությանը: Ենթական անցյալում հանդիսացել է Անկարայից Երեւան պատգամներ փոխանցող: Դժվար է գուշակել, թե այս անգամ Էոզարարատը ի՞նչ պատգամ է փոխանցել հայկական իշխանություններին, սակայն վերջին օրերին նրա երեւումը Երեւանումՙ լուրջ պատճառ է մտահոգության, Հայաստանի թե Սփյուռքի համար:

Ռամկավար Ազատական կուսակցության Գերագույն խորհուրդը սույն Հայտարարությամբ գալիս է զգուշացնելու Հայաստանի իշխանություններին, թե աշխարհի համայն հայությունը ահազանգի մեջ է խուսափելու համար պատմակշիռ մի ծանր վտանգից: