2022-Ը` ԱՇԽԱՏԱՆՔԻ ՏԱՐԻ ԳԵՂԱՄ ՔՅՈՒՐՈՒՄՅԱՆ Տարեմուտ է, արած-չարածը գնահատելու, բարեմաղթանքներ հնչեցնելու, սպասումների տրվելու: Տարողունակ մի շրջան, որտեղ թերեւս տեղին է առաջնորդվել խոսքի կարճը, պարանի երկարը մոտեցումով: Եվ այսպես. անցնող տարվա հիմնահարցը անվտանգությունն էր, բուն պաշտպանականից մինչեւ հոգեւոր-մշակութային ու պարենանվտանգային, առողջապահական ու կրթական... Հատկապես վերջինի պարագայում կարծիքները սպասվածից տարաբնույթ են, ոլորտը բարեփոխելու ջանքերից մինչեւ անցյալին վերադառնալու առաջարկներով: Վերջին կողմնակիցներից մեկը նշում էր, որ բարեփոխման անհրաժեշտություն չկա, քանզի ընտանիքներ ունենք, ուր հինգ անդամներից երեքը տնտեսագիտության դոկտորներ են, չորրորդը` նույն ոլորտի թեկնածու, որոնց ղեկավարում է խոհանոցային անզուգական հմտությունների գիտակՙ ընտանիքի մայրը: Նա, այսուամենայնիվ, գտնում է, որ խոհանոցի հեռուստացույցից, ասենք Հ-1-ով հնչողՙ «ինքնաթիռը թռչել է», «դատապարտյալը փախչել է» արտահայտչաձեւերի համար կարիք չկա բարեփոխումների տրվել, այլ ընդամենը քերականության կանոնները պահպանել: Իսկ այ գնումներ կատարելիս նրա զարկերակային ճնշման տատանումները լուրջ անհանգստություն են պատճառում դոկտորականի ուղղությամբ աշխատող առայժմ գիտության թեկնածու աղջկան: Բացատրությունը, թե` գներ են, կբարձրանան, համաշխարհային գործընթաց է, գուցե նաեւ իջնեն, ոչ մի կերպ չի համոզում իրեն հարցումներով դիմող հարեւանուհիներին, որոնք ինչ-որ ակնկալիք ունեն գիտական կաճառ հիշեցնող այսօրինակ ընտանիքներից, որոնցից մեկում էլ գտնում են, որ համաշխարհային հանրությանը հարկ է ներկայանալ մեր դարավոր մշակութով ու... այդկերպ հաղթել: Ավաղ, գրեթե խոսք չկա նորին գերազանցություն աշխատանք համարվողից, որը հոմանիշ է ջանք, ճիգ, գործ հասկացություններին: Կարծես այստեղ արմատավորվում է զահլա չկա մոտեցումը, որի հաստատումն է, ասենք... հողից խռովելը, որի հետեւանքները զգում է երկրի բնակչության բացարձակ մեծամասնությունը, վարսավիրից մինչեւ վարորդ, մանկավարժ ու բժիշկ: Անգամ պատկերացնել պետք չէ այն պահն ու վիճակը, երբ կհայտնվենք պարզապես ոչինչ չանողի, կտուր վառողի դերում: Այսուհանդերձ հուսանք, որ բոլոր պարագաներում 2022-ին կենսաթոշակ-ԱԺ պատգամավորի աշխատավարձ 40.000-800.000 դրամ 1:20 չափաբաժինը գոնե կկազմի 80.000-800.000 դրամ: Աշխատանք բոլոր առումներով, ահա այն բարեմաղթանքը, որ միմյանց հարկ է ուղղել 2022-ին: Եվ ամեն ինչ լավ կլինի, մեզ արժանի ժամանակը կգա: Անշուշտ` առաջն Աստված: Հետգրություն Տեսար` էժանացրին Ծանոթներիցս մեկը օրերս հետեւյալ զրույցն արեց: Ջիպ եմ ցանկանում գնել, բայց..., խոսքն անավարտ թողեց: - Ինչ բայց, գնիր եւ վերջ, - հորդորեցի ես: - Դե, լվանալու խնդիր կա: Փոքր մեքենաները 1000 դրամով են լվանում, սեդանները` 1500-ով, ջիպերը` 2500-ով: Գուցե սպասեմ եկող տարվան, տեսար էժանացրին: Մարդը չգիտեր, որ հունվարի 1-ից ջուրն էլ է թանկանում: 20.12.2021թ. |
