Մահվան 50-ամյակի առթիվ
Անցած օգոստոսին կես դար լրացավ այն օրվանից, ինչ կյանքից հեռացավ 20-րդ դարի ամենահռչակավոր կանանցից մեկըՙ Մերիլին Մոնրոն: Այլեւս աներկբա է, որ սերունդները մշտապես փնտրելու են նրան, ոգեշնչվելու են նրանով, իսկ Մոնրո երեւույթը մնալու է որպես հանրային-մշակութային հազվագյուտ մի ֆենոմեն: Եվ իսկապես, այս կինոդերասանուհին, որը չի ստեղծել մեծաթիվ բարձրարվեստ դերակատարումներ (նրա մասնակցությամբ որոշ կինոնկարներ այսօր պարզապես չեն դիտվում), սակայն դարձել է կինոյի պատմության մեծագույն լեգենդներից մեկը: Եվ այստեղ հարցը միայն նրա արտաքին բարեմասնությունները չեն (շատ-շատերի համար Մոնրոն կնոջ գեղեցկության կատարելատիպ չէ): Երբ անցյալ դարի կեսին բարձրացավ Մոնրոյի աստղը, համաշխարհային հանրությունը ծարավի էր էկրանային նոր կուռքի, իսկ այդ խարտյաշ գեղեցկուհին լիովին բավարարում էր իր ժամանակի կինոէկրանի թագուհու եւ սեքս խորհրդանիշի պահանջները: Նա եկավ աննկատ, փայլատակեց կարճատեւ, բայց ուժգին, նվաճեց անթիվ քանակությամբ սրտեր եւ խորհրդավոր կերպով էլ անհետացավՙ իր դեմքը դարձնելով դարի սրբապատկերներից մեկը, որն այսօր ժպտում է միլիոնավոր օրացույցներից, շապիկներից, պայուսակներից...
Կինոյի այս մեծ լեգենդիՙ Մերիլին Մոնրոյի մահվան 50-ամյակի առթիվ ներկայացնում ենք մի փունջ տարբեր տարիներին նրա արտահայտած մտքերից:
* Երբ ես փոքր աղջիկ էի, ոչ ոք ինձ չէր ասում, որ ես գեղեցիկ եմ: Բոլոր փոքրիկ աղջիկներին պետք է ասել դա, եթե նույնիսկ նրանք գեղեցիկ չեն:
* Ես չեմ ցանկանում փող աշխատել, ես պարզապես ցանկանում եմ հրաշալի լինել:
* Ես շատ որոշակիորեն կին եմ, եւ ինձ դուր է գալիս դա:
* Ես ցանկանում եմ լինել մի փոքր ավելի մեծ, քան մնացած բաները: Դա թանկարժեք բան է:
* Ես սիրում եմ անել բաներ, որոնք գրաքննությունը չի թույլատրի:
* Դերասանուհի դառնալ երազելն ավելի հուզիչ է, քան դերասանուհի լինելը:
* Անկատարելությունը գեղեցկություն է, խենթությունըՙ հանճար, եւ ավելի լավ է լինել բացարձակապես ծիծաղելի, քան բացարձակապես ձանձրալի:
* Ընկերությունը լավագույնագույն (bestest ) բանն է կյանքում:
* Երբ մարդիկ նայում են ինձ, նրանք ուզում են տեսնել աստղ:
* Միայն հանրությունը կարող է մեկին աստղ դարձնել: Ստուդիաներն են, որ փորձում են դրանից համակարգ ստեղծել:
* Ես փորձում եմ գտնել ինձ որպես անձ, երբեմն հեշտ չէ դա անել: Միլիոնավոր մարդիկ իրենց ողջ կյանքն ապրում ենՙ առանց գտնելու իրենց: Բայց սա մի բան է, որը ես պետք է անեմ: Ինձ գտնելու լավագույն ուղին ինքս ինձ ապացուցելն է, որ ես դերասանուհի եմ:
* Հավաքույթների ժամանակ ես հաճախ ժամերով լուռ եմ մնում եւ լսում եմ, թե ինչպես են կինոյի իմ կուռքերը դառնում բութ ու մանր մարդիկ:
* Խելացի աղջիկը համբուրում է, բայց չի սիրում, լսում է, բայց չի հավատում եւ հեռանում էՙ նախքան իրենից կհեռանան:
* Ես լավն եմ, բայց հրեշտակ չեմ: Ես մեղավոր եմ, սակայն հրեշ չեմ: Ես ընդամենը մի փոքր աղջիկ եմ մեծ քաղաքում, որը փնտրում եմ մեկին, որ սիրի:
* Ես նույնպես զգացմունքներ ունեմ: Ես տակավին մարդ եմ: Ամենը, ինչ ես ուզում եմ, սիրված լինելն էՙ իմ եւ իմ տաղանդի համար:
* Եթե դու կարողացել ես ծիծաղեցնել աղջկան, ամեն ինչ կարող ես նրան անել տալ:
* Կնոջը, որին ճանաչել են տղամարդու միջոցով, սխալ են ճանաչել:
* Կինը չի կարող միայնակ լինել: Նա կարիք ունի տղամարդու: Տղամարդն ու կինը աջակցում եւ ուժեղացնում են մեկմեկու: Կինը չի կարող միայնակ անել դա:
* Մինչեւ ամուսնությունը աղջիկը պետք է սեր անի տղամարդու հետ, որպեսզի պահի նրան: Ամուսնությունից հետո նա պետք է պահի տղամարդուն, որպեսզի սեր անի նրա հետ:
* Եթե դու պիտի երկու երես ունենաս, դրանցից գոնե մեկը գեղեցիկ դարձրու:
* Ավելի լավ է դժբախտ լինել մենակ, քան դժբախտՙ ինչ-որ մեկի հետ:
* Տուր աղջկան ճիշտ կոշիկներ, եւ նա կնվաճի աշխարհը:
* Չգիտեմ, թե ով է հայտնագործել բարձր կրունկները, բայց բոլոր կանայք պարտական են նրան:
* Սեքսը բնության մի մասն է: Ես համահունչ եմ բնությանը:
* Մենք բոլորս ծնվում ենք որպես սեքսուալ արարածներ, փառք Տիրոջը, սակայն ափսոս, որ այնքան շատ մարդիկ քամահրում եւ խեղդում են այդ բնական պարգեւը:
* Երբ փող չունեսՙ հացի խնդիր ունես: Երբ փող ունեսՙ սեքսի խնդիր ունես: Երբ այդ երկուսն էլ ունեսՙ առողջության խնդիր ունես: Երբ ամեն ինչ տեղում էՙ վախենում ես մահից:
* Ես վերականգնվում եմ, երբ մենակ եմ:
* Շարունակիր ժպտալ, քանի որ կյանքը գեղեցիկ է, եւ այնքան բաներ կան ժպտալու:
* Ես դեմ չեմ ապրել տղամարդկանց աշխարհում, այնքան, որքան որ ես կարող եմ կին լինել այնտեղ:
* Ո՞վ ասաց, որ գիշերը քնելու համար է:
* Ինձ համար լավագույն բանը քունն է, այդժամ ես կարող եմ առնվազն երազ տեսնել:
* Այն կանայք, որոնք ցանկանում են լինել տղամարդկանց հավասար, փառասիրության պակաս ունեն:
* Դու հավատում ես ստերին, ուրեմն աստիճանաբար չես վստահում ոչ մեկինՙ քեզնից բացի:
* Եթե ես պահպանեի բոլոր կանոնները, ոչ մի տեղ չէի հասնի:
* Ինչ եմ կրում ես անկողնո՞ւմ: Դե իհարկե, «Շանել թիվ 5»:
* Հաջողության պատճառով այնքան շատ մարդ է ատում քեզ: Չէի ցանկանա, որ այդպես լիներ: Հիանալի կլիներ վայելել հաջողությունըՙ առանց նախանձ տեսնելու շրջապատիդ աչքերում:
* Փառքը մշտական չէ, եւ ես գիտեմ դա: Այն ունի իր առավելությունները, ունի նաեւ իր թերությունները. ես ճաշակել եմ երկուսն էլ:
* Ես միշտ ինձ անապահով եմ զգացել, բայց ամենից շատՙ վախեցած: Կարծում եմ, աշխարհում ամեն ինչից շատ սեր եմ ցանկացել:
* Դերասանուհին մեքենա չէ, բայց նրա հետ վարվում են, ինչպես մեքենայի հետ: Փողի մեքենայի:
* Սեքս խորհրդանիշ լինելը ծանր բեռ է, հատկապես եթե դու հոգնած ես, վիրավորված եւ շփոթված:
* Որպես կինՙ ես ձախողված եմ: Իմ տղամարդիկ այնքան շատ բան են ակնկալում ինձնիցՙ այն իմիջի պատճառով, որ նրանք ստեղծել են ինձնից եւ որը ես եմ ստեղծելՙ որպես սեքս խորհրդանիշ:
* Իհարկե, ես լուսանկարվել եմ մերկ: Ինձ փող էր պետք:
* Հոլիվուդում աղջկա արժանիքը պակաս կարեւոր է, քան նրա սանրվածքը: Քեզ դատում են ըստ քո տեսքի, այլ ոչ ըստ նրա, թե ով ես դու:
* Հոլիվուդը մի վայր է, որտեղ քեզ հազար դոլար են վճարում համբույրի եւ հիսուն սենթՙ քո հոգու համար: Ես դա գիտեմ, քանի որ ես մերժել եմ առաջին առաջարկը բավական հաճախ եւ ձեռքս պարզել հիսուն սենթի համար:
* Շները երբեք ինձ չեն կծել: Միայն տղամարդիկ:
* Ես կցանկանայի ծերանալՙ առանց դեմքիս մաշկը ձգելու: Ես ուզում եմ հավատարիմ մնալ այն դեմքին, որը ես եմ ստեղծել: Երբեմն մտածում եմ, որ ավելի հեշտ կլիներ խուսափել ծերությունից, մեռնել երիտասարդ, բայց այդժամ կյանքդ ամբողջական չէր լինի, այնպես չէ՞: Դու երբեք լիովին չես ճանաչի ինքդ քեզ:
* Ես հայտնվել եմ օրացույցի վրա, սակայն ոչՙ ժամանակի:
Նախաբանը եւ թարգմանությունն անգլերենիցՙ ԱՐԾՎԻ ԲԱԽՉԻՆՅԱՆԻ