ԿԱՀԻՐԵԻ ՀԱՄԱԼՍԱՐԱՆՈՒՄ ՎԵՐԱԲԱՑՎԵԼ Է ՀԱՅԱԳԻՏԱԿԱՆ ԿԵՆՏՐՈՆԸ Հ. Հ. Կահիրեի համալսարանի խորհուրդը, համալսարանի նախագահ Կապեր Նասսարի գլխավորությամբ որոշում է կայացրել համալսարանում վերաբացել Հայագիտական ուսումնասիրությունների կենտրոնը, որը անսպասելիորեն եւ առանց որեւէ բացատրության փակվել էր անցյալ տարի: Ոչ անհիմն ենթադրություններ կան, որ այն փակվել էր թուրքական ճնշումների հետեւանքով: Նշենք, որ մինչեւ գեներալ Սիսիի վարչախմբի իշխանության գալը, նախկինՙ իսլամիստական իշխանության օրոք, թուրքական ազդեցությունը շատ ուժեղ էր Եգիպտոսում, ընդհուպՙ համալսարանական ու գիտական ոլորտներում: Համալսարանին հղած դիմումներին ի պատասխան Նասսարին նշել է, որ կենտրոնը կվերաբացվի Արեւելագիտության բաժանմունքում: Եգիպտական «MENA» գործակալության փոխանցմամբ,Նասսարը հայտարարել է, որ վերաբացվող կենտրոնը Կահիրեի համալսարանում հայագիտական ուսումնասիրությունների բաժանմունքի կորիզը կդառնա: Մերձավոր Արեւելքի ամենամեծ բուհի` Կահիրեի պետական համալսարանի բանասիրության Ֆակուլտետում դեռեւս 2007թ-ին հիմնված Հայագիտական կենտրոնը հայերեն, հայկական մշակույթ ու պատմությունն ուսումնասիրող մի քանի տասնյակ ուսանող ուներ: Կենտրոնի գործունեության առաջին տարիներին ամեն ամիս 100 ուսանողի համար հայերեն դասընթացներ են կազմակերպվել Հայաստանի մշակույթի, քաղաքակրթության, պատմության վերաբերյալ: |
