ՀԱՅԿԱԿԱՆ ԱՐՎԵՍՏԻ ՈՒ ՄՇԱԿՈՒՅԹԻ ՄԱՍԻՆ ՈՒՈԹԵՐԹԱՈՒՆՈՒՄ Հ. Ծ. Նոյեմբերի 30-ին Ուոթերթաունի Ամերիկայի հայկական թանգարանում (ALMA) կայացել է երկու դասախոսություն: Առաջին ելույթ ունեցողը, Նյու Յորքի Մետրոպոլիտեն արվեստի թանգարանի կուրատոր դոկտ. Հելեն Էվանսը , խոսել է Հայաստանում քրիստոնեության ընդունման, Միջին դարերում հայկական արվեստի զարգացման եւ համաշխարհային արվեստի վրա նրա թողած կարեւոր ազդեցության մասին, հավելելով, որ 2018-ի սեպտեմբերի 21-ից մինչեւ 2019-ի հունվարի 13-ը Մետրոպոլիտենում կազմակերպվելու է աննախադեպ ցուցահանդես նվիրված հայկական միջնադարյան արվեստին: Էվանսը բյուզանդական եւ հայկական արվեստի մասնագետ է: Նրա ատենախոսության թեման եղել է կիլիկյան նկարազարդ ձեռագրերը: Նախկինում նա մասնակցել է Մորգան թանգարան-գրադարանում 1994-ին եւ Մետրոպոլիտենում 1997-ին կայացած հայկական արվեստի ցուցահանդեսների կազմակերպմանը: Դրանք այդ տարիներին «Նյու Յորք Թայմս» եւ «Ապոլո» պարբերականների կողմից ճանաչվել են «կարեւոր մշակութային միջոցառումներ»: Նա նաեւ հայկական արվեստ է դասավանդում Կոլումբիա համալսարանում: Միջնադարյան արվեստի միջազգային կենտրոնի (ICMA) նախագահն է: Երկրորդ ելույթ ունեցողը եղել է Հրայր Խաչերյանը (Հրայր Բազե), որ 1993-ին քաղցկեղը հաղթահարելուց հետո իր կյանքը նվիրել է հայկական խաչքարերի հրաշալի հարստությունը լուսանկարելուն եւ հրատարակել է «Խաչքար» գիրք-ալբոմը: Ծնվել է Լիբանանում 1961-ին: Տեղափոխվել է Կանադա 1984-ին: Հրատարակված մյուս ալբոմների թվում են «Արցախը» (1997), «Ղարաբաղը» (2002), «Երկիր» (2005), «Մեկ ազգ, մեկ եկեղեցի» (2013) եւ «100 (1915-2015)-ը»: | 
