ՆՈՐԱ ԱՐՄԱՆԻՆ ՎԵՐԱԴԱՌՆՈՒՄ Է ԲԵՄ Հ. Ծ. Իր ստեղծագործական կյանքը հավասարապես Նյու Յորքում, Փարիզում եւ Երեւանում անցկացնող բազմատաղանդ Նորա Արմանին, որին վերջերս եվրոպացի ճանաչված կինոքննադատ Նադիա Իգնին բնութագրել է որպես «զարմանահրաշ կին», դարձյալ թատերական բեմահարթակ է վերադարձել եւ ստանձնել մոր գլխավոր դերը «Raison d՛Etre: An Evening of Pirandello» խորագրով աշխույժ եւ հուզախառն ներկայացման մեջ, հիմնված իտալացի Նոբելյան մրցանակի արժանացած գրող Լուիջի Պիրանդելլոյի (1867-1936) հայտնի «վեց գործող անձ հեղինակի որոնումներում» եւ երկու նվազ հայտնի «Չի Չի» եւ «Ծաղիկը բերանում մարդը» մեկ արարանոց պիեսների վրա: Պիրանդելլոյի դասական երկի ժամանակակից մեկնաբանությունը, ըստ «Միրոր Սփեքթեյթրի», քննարկում է անհատի ինքնությունը հաստատելու հարցերը մի ժամանակաշրջանում, որտեղ մարդը ստիպված է պայքար մղել իր ներքին էության, եւ սոցիալապես պարտադրված էության միջեւ: Պիեսը, որը բեմականացրել է Ջենիֆեր Ջուըլը (ռեժիսոր Պատրիկ Մուլրյանի վերամշակված տարբերակի հիման վրա) ներկայացվել է Մանհաթենի վերանորոգված «Թատրոն 71-ում»: Արմանին վերջին տարիներին մեծ ջանքեր գործադրելով հիմնել է սոցիալական հարցեր քննարկող «Socially Relevant» կինոփառատոնը, որն արդեն իսկ դարձել է Նյու Յորքի թատերական կյանքի անբաժանելի մասը: «Նոր դերը առինքնող է: Չափազանց ուրախ եմ, որ բեմ եմ վերադառնում», խոստովանել է նա: | 
