ՈԳԵՇՆՉՈՂ 10-ՐԴ ՏԱՐԵԴԱՐՁ ԿԱՌՆԵԳԻ ՀՈԼՈՒՄ Հ. Ծ. Դոկտ. Իրինա Կակոսյանի եւ դոկտ. Քեն Կիրակոսյանի հովանավորությամբ Նյու Յորքի հռչակավոր Կառնեգի Հոլում հոկտեմբերի 20-ին տեղի է ունեցել ոգեշնչող մի համերգ նվիրված միաժամանակ Երեւանի 2800-ամյակին եւ «Անմիջական օգնություն Հայ ժողովրդին» (Direct Help for Armenian People) հասարակական կազմակերպության հիմնադրման 10-րդ տարեդարձին, տեղեկացնում է Ֆլորենս Ավագյանը Նյու Յորքից: Ողջույնի խոսքով հանդես է եկել ԱՕՀԺ կազմակերպության հիմնադիր եւ նախագահ դոկտ. Սվետլանա Ամիրխանյանը , որից հետո Եվգենիա Սարյանի հանդիսավարության ներքո ելույթ են ունեցել եզրափակիչ փուլ հասած տաղանդավոր հայ երիտասարդներ: Բուռն ծափահարությունների ներքո Համազգայինի «Արեգակ» երգչախմբի (խմբավար Վաղարշակ Օհանյան ) 17 անդամները ներկաներին պարգեւել են հուզախառն հայկական երգերի մի գեղեցիկ փունջ: Խաչատրյանական դաշնամուրային կատարումներով աչքի են ընկել Դավիթ Ավետիսյանը , Յանա Պրախինան , Մաքսիմ Տեսովիչը , իսկ Ալեքս Վարդանյանը խորը ըմբռնումով հնչեցրել է կոմպոզիտորի հանրահայտ «Վալսը»: Երեկոյի ընթացքում հնչել են հատվածներ նաեւ Բեթհովենի, Էդ. Բաղդասարյանի, Կաբալեւսկու եւ Ռոբերտ Ուորդի ստեղծագործություններից, որոնք մեծ վարպետությամբ ներկայացվել են Միխայիլ Խուրիի , Էնդրու Բոլդի , Արեն Առաքելյանի , Դավիթ Հովհաննիսյանի , Լաուրա եւ Լիլիթ Նավասարդյանների կատարմամբ: Բարսեղ Կանաչյանի սիրված «Օրորը» քնքշությամբ երգել են Սարին եւ Արյա Բալյանները : Վերջում հարգանքի տուրք մատուցելով մեծն Շառլ Ազնավուրին, «Արեգակ» երգչախումբը կատարել է նրա «Հայաստան» եւ Էդ. Հովհաննիսյանի «Էրեբունի-Երեւան» երգերը, արժանանալով հոտնկայս ծափողջույնների: ՄԱԿ-ում ՀՀ դեսպան Մհեր Մարգարյանը հատուկ հուշագրեր եւ գեղեցիկ ծաղկեփնջեր է նվիրել միջոցառումը կազմակերպողներինՙ դոկտ. Սվետլանա Ամիրխանյանին, Մարինա Բաղդասարովային, Եվգենիա Սարյանին: Երկար տարիների նվիրյալ աշխատանքի համար շնորհակալագիր է ստացել նաեւ Վաղարշակ Օհանյանը: Թեքեյան մշակութային միության Նյու Յորք-Նյու Ջերսիի մասնաճյուղի պատվավոր նախագահ Հակոբ Վարդիվառյանը շնորհակալություն է հայտնել կազմակերպիչներին «հայկական մշակույթն ու շունչը նոր սերունդին պարգեւելու համար»: | 
