ՖՐԱՆԿՈ ՁԵՖԻՐԵԼԻ (1923-2019) Ա. Բ. Հունիսի 15-ին, Հռոմում, 96 տարեկանում վախճանվեց իտալացի մեծանուն կինոբեմադրիչ, արտադրիչ, սցենարիստ, օպերաների բեմադրիչ, «Էմմի» մրցանակի կրկնակի դափնեկիր Ֆրանկո Ձեֆիրելին: Իտալական եւ համաշխարհային կինոյի գանձարանը վաղուց մուտք են գործել նրա «Անսանձ կնոջ սանձահարումը» (1967), «Ռոմեո եւ Ջուլիետ» (1968), «Հիսուս Նազովրեցին» (1977), «Պայացներ» (1982), «Տրավիատա» (1983), «Օթելլո» (1986), «Համլետ» (1990), «Ջեն Էյր» (1996) ֆիլմերը: Կինոյում նրա վերջին աշխատանքներն էինՙ «Թեյ Մուսսոլինիի հետ» (1999, գլխավոր դերերից մեկումՙ Շեր) եւ «Կալլասն առհավետ» (2002, գլխավոր դերումՙ Ֆանի Արդան, ներկայացնում է Մարիա Կալլասի երեւակայական կենսագրությունը): Դրամատիկական թատրոնում Ֆրանկո Ձեֆիրելին բեմադրել էր Շեքսպիրի գլխավոր գործերը, Էդուարդ Օլբիի «Ո՞վ է վախենում Վիրջինիա Վուլֆից» թատերախաղը, օպերայում (մասնավորապեսՙ Միլանի «Լա Սկալայում»)ՙ «Տրավիատան» եւ «Նորման» (գլխավոր դերերումՙ Մարիա Կալլաս), «Լուչիա դի Լամերմուրը», «Պայացները», «Ֆալստաֆը», «Տոսկան», «Դոն Կառլոսը», «Տուրանդոտը», «Դոն Ժուանը», «Բոհեմը» եւ այլն... |
