Տեղադրվել է` 2019-12-26 22:47:26 (GMT +04:00)

Ընթերցված է` 1401, Տպվել է` 4, Ուղարկվել է էլ.փոստով` 0

ԿՈՄԻՏԱՍԸ ԵՎ ԹՈՒՄԱՆՅԱՆԸ ՏԱՇՔԵՆԴՈՒՄ

Գեորգի ՍԱԱԿՈՎ

Դեկտեմբերի 17-ին Տաշքենդի պետական կոնսերվատորիայի երգեհոնային դահլիճում տեղի ունեցավ հիշատակի երեկոՙ նվիրված հայ երաժշտության եւ գրականության դասականներիՙ Կոմիտաս Վարդապետի եւ Հովհաննես Թումանյանի 150-ամյակին:

Նախագծի գաղափարի եւ դրա բարեհաջող իրականացման հեղինակը Ուզբեկստանում հայերի հոգեւոր առաջնորդ, ավագ քահանա Տեր Հովհաննես Գրիգորյանն էր:

Միջոցառման պատրաստմանը մասնակցել են համայնքի ակտիվիստները: Կոմիտասի երաժշտական ստեղծագործությունները հնչեցին Տաշքենդի պետական կոնսերվատորիային առընթեր երաշտական թատրոն-ստուդիայի երգչախմբի կատարմամբ, Յուլդուզ Խուսնուտդինովայի ղեկավարությամբ: Համերգի ընթացքում երգեհոնի բաժինը կատարել է Բոբուռ Միրսաիդովը:

Ծրագրի ընթացքում Կոմիտասի ստեղծագործական ժառանգությունից կազմված երաժշտական համարները հերթագայվում էին երկու հայ մեծ մտավորականների կյանքի ճանապարհի, հասարակական գործունեության մասին տեղեկությամբ, ինչպես նաեւ Հովհաննես Թումանյանի բանաստեղծությունների եւ պոեմներից հատվածների կատարմամբ:

Հուշ-երեկոյի հանդիսատեսներն էին Ուզբեկստանի հայ համայնքի ներկայացուցիչները, հյուրեր Տաշքենդի ռուսական, հրեական, հունական եւ միջազգային միության կազմում գտնվող այլ հոգեւոր-ազգային կենտրոններից, կաթոլիկ համայնքի, աստվածաշնչյան ընկերության, հրեական սինագոգի ներկայացուցիչներ:

Տաշքենդում միջոցառումը տեղի է ունեցել Հայաստանում եւ սփյուռքում համազգային միջոցառումների տարվա շրջանակներում, եւ նվիրված էր նշանակալից տարեթվերին:

Ռուսերենից թարգմանեց ԳԵՎՈՐԳ ԱՍԱՏՐՅԱՆԸ