ՀԱՅՏՆԻ ՈՒԴԱՀԱՐԸ ԳԼԵՆԴԵՅԼԻ «ԱՊՐԻԼ» ԳՐԱԽԱՆՈՒԹՈՒՄ Հ.Ծ. Վաղըՙ փետրվարի 22-ին, Գլենդեյլի «Ապրիլ» գրախանութում «Պատմական Հայաստանի երաժշտությունը» թեմայի շուրջ դասախոսություն է կարդալու վիրտուոզ ճանաչված ուդահար Ռիչարդ Հակոբյանը, որն իր ելույթը համեմելու է ուդի նվագակցությամբ եւ իրեն ոգեշնչած վարպետներիՙ մասնավորապես Ուդի Հրանդի, Թադեոս Էքսերճյանի եւ Կնունի Կարպիս Բաքրճյանի հիշողություններով: Հակոբյանը ծնվել է Ֆաուլերում (Կալիֆոռնիա) 1937-ին, երաժշտության հետ առնչվել է մանուկ հասակիցՙ նվագելով ջութակ եւ կլարնետ 9 տարեկանից եւ ուդՙ 11 տարեկանից: Աշակերտել է Բաքրճյանին եւ հեռակա դասեր վերցրել Ստամբուլում ապրող հայ կույր ուդահար Հրանտ Քենքուլյանից, որը 1969-ին նրան վարպետի կոչում է շնորհել: Հակոբյանը մեծ հռչակ եւ ժողովրդականություն է ձեռք բերել անցյալ դարի 60-70-ականներին, երբ համագործակցել է «Քեֆ թայմ բենդ» նվագախմբի հետ, որն սկզբնական շրջանում կազմվել է 1963-68 թվերին Լաս Վեգասի «Cleopatra Revue» շոուին մասնակցելու համար: Հետագայում պարային երաժշտության այդ ոճը մեծ տարածում է ստացել ամերիկահայության շրջանում: Բացի Մ. Նահանգների տարբեր քաղաքներում ելույթներ ունենալուց, Հակոբյանը վարպետության դասեր է տվել Մանհաթընի երաժշտական դպրոցում եւ դասավանդել Կալիֆոռնիայի պետհամալսարանում: Նրա նվագելու վարպետությունն ու հմայիչ վոկալ տվյալները հիացրել են հազարավոր ունկնդիրների: 1989-ին նրան է շնորհվել «National Heritage Fellowship» (Ազգային ժառանգությունը պահպանելու) ընկերության պատվավոր մրցանակը: | 
