ԽԱՉԱՏՈՒՐՅԱՆԻ ԵՐԱԺՇՏՈՒԹՅՈՒՆԸ ԱՄԵՐԻԿՅԱՆ ԲԱԼԵՏՈՒՄ Հ.Ծ. Ներկայացվել է Ռատմանսկու «Սեր եւ ցասում» բալետը Մարտի 5-ին Կոստա Մեսայի (Կալիֆոռնիա) Արվեստների Սեգերստրոմ կենտրոնում կայացել է «Ամերիկյան բալետային թատրոնի» գեղարվեստական ղեկավար, «Genius Grant» մրցանակի արժանացած Ալեքսեյ Ռատմանսկու «Սեր եւ ցասում» լիամետրաժ բալետային ներկայացման առաջնախաղը: Ըստ «Միրոր-Սփեքթեյթր» շաբաթաթերթի, դա Ռատմանսկու 17-րդ ստեղծագործությունն է այդ թատրոնում եւ հիմնված է մ.թ. առաջին դարի կեսերին Խարիտոնի գրած Կալիրոուի (Callirhoe)ՙ սիրային վեպի վրա, որտեղ իդեալական սիրահարները հաղթահարելով ճակատագրի հարվածներն ու առօրյա գայթակղությունները հավատարիմ են մնում իրար: Բալետային ներկայացման համար, որը թատրոնի հիմնադրման 80-ամյակի առթիվ մասնակի բեմադրվելու է մայիսի 18-ին կայանալիք «գարնանային գալայի» ժամանակ, իսկ Նյու Յորքում ունենալու է իր համաշխարհային առաջնախաղը հունիսի 2-ին, Ռատմանսկին ընտրել է Արամ Խաչատուրյանի ստեղծագործություններից մի հոյակապ «ծաղկեփունջ», խոստովանելով, որ «մեծ սեր ու հարգանք է տածում մեծանուն կոմպոզիտորի եւ նրա եռանդուն, կենսունակ եւ հուզախառն երաժշտության հանդեպ»: Բեմադրության երաժշտական մշակումը կատարել է բրիտանացի ճանաչված կոմպոզիտոր եւ դաշնակահար Ֆիլիպ Ֆինին , իսկ բեմական ձեւավորումն ու զգեստների ընտրությունըՙ ֆրանսիացի Ժան-Մարկ Պուիսանը : Հիմնադրման 80-ամյակի համար թատրոնը նախատեսել է նաեւ այլ միջոցառումներ: Նկար 1. Տեսարան «Սեր եւ ցասում» բալետից: Նկար 2. Ալեքսեյ Ռատմանսկի: | 
