ՊԱՏԵՐԱԶՄԻ ԵՎ ԱՎԵՐԱԾՈՒԹՅՈՒՆՆԵՐԻ ՄԵՋ ՀԱՅՏՆՎԱԾ ՍԻՐԻԱՆՙ ՈՂՋ ՆԱԽԿԻՆ ԳԵՂԵՑԿՈՒԹՅԱՄԲ ԵՎ ՀՄԱՅՔՈՎ

ՀԱՂՈՐԴԱԳՐՈՒԹՅՈՒՆ ՍԽԱԼԻ ՄԱՍԻՆ

Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։

«ԱԶԳ» ՕՐԱԹԵՐԹ #167, 2013-10-03

Մշակույթ

ՊԱՏԵՐԱԶՄԻ ԵՎ ԱՎԵՐԱԾՈՒԹՅՈՒՆՆԵՐԻ ՄԵՋ ՀԱՅՏՆՎԱԾ ՍԻՐԻԱՆՙ ՈՂՋ ՆԱԽԿԻՆ ԳԵՂԵՑԿՈՒԹՅԱՄԲ ԵՎ ՀՄԱՅՔՈՎ

Ցուցահանդես-վաճառք

Պատերազմի եւ ավերածությունների մեջ հայտնված Սիրիան այսօր ներկայացվեց նախկին ողջ գեղեցկությամբ եւ հմայքով: Թումանյանի անվան տուն-թանգարանում բացվեց սիրիահայ լուսանկարիչ Վահե Շահինյանի «Սիրիան իմ հիշողություններում» լուսանկարների ցուցահանդես-վաճառքը, որի ողջ հասույթն ուղղվելու է Հայաստան տեղափոխված սիրիահայերի օգնության ծրագրերին:

Լուսանկարիչն իր լավատեսական շեշտադրումներով մերժում է պատերազմն ու հավատում Սիրիայի ապագային... որ խաղաղության աղավնին օր առաջ թեւածի Սիրիայի երկնքում:

Լուսանկարիչ Վահե Շահինյանն արդեն երեք տարի է լուսանկարչական ապարատը ձեռքը չի վերցրել, պատճառը Սիրիայի արյունահեղ վիճակն է: Այսօր ցուցահանդեսին ներկայացնում է մոտ երեսուն տարվա իր աշխատանքը: Որոշել է օգնել սիրիահայերին եւ ցուցահանդես-վաճառքի ամբողջ հասույթը տրամադրել նրանց:

«Բոլոր լուսանկարներն էլ հարազատ են, բոլորի համար էլ սիրտս ցավում է»,- ասաց նա եւ հավելեց, որ ցուցահանդեսի նպատակն է Հայաստանում ապրող տասը հազարից ավելի սիրիահայերի մոտ լավ հիշողություններն արթնացնելը:

«Ուզում էի նաեւ, որ Հայաստանում ապրող հայն իմանա, որ Սիրիան պատերազմ չէ, պատերազմի երկիր չէ»,- լուսանկարիչը հուզվեց ու չկարողացավ շարունակել խոսքը... Հետո էլ ասաց. «Սիրիայում խաղաղություն էր, իսկ Եվրոպան, Ամերիկան ու Իսրայելը չեն ուզում Սիրիան բարգավաճի, զորանա...Հիմա Սիրիան հիսուն տարի հետ գնաց»:

Վահե Շահինյանն արդեն 15 օր է, ինչ Հայաստանում է: Ասում էՙ եթե առիթ լինի, կմնա: Եկել է ընտանիքի հետ: «Հայաստան տեղափոխված սիրիահայերը պետք է հարմարվեն ու ապրեն այստեղ, չկարողանալ չկա,- ասաց նա եւ ավելացրեց,- Մոտ 20-30 հազար հայեր դեռ այնտեղ են: Ապրելը հիմա Սիրիայում բախտ է, չգիտես` ինչ կլինի հաջորդ րոպեին, մեքենա՞ կպայթի կամ մեկ ուրիշ բան»: Հարցինՙ ինչու չեն գալիս Հայաստան, պատասխանեց. «Ինչպե՞ս գան: Երեք տարի է անգործ են, փող չունեն, ինչպե՞ս գան: Նույնիսկ տունը չեն կարող վաճառել»:

Ցուցահանդեսը բացվեց Ամենայն Հայոց կաթողիկոս Գարեգին Բ-ի օրհնությամբ, ում լուսանկարիչն իր նկարը նվիրեց եւ շնորհակալություն հայտնեց հայրապետական հոգատարության ու սիրիահայերին ցուցաբերած հսկայական օգնության համար:

Ցուցահանդեսը բաց կլինի մինչեւ հոկտեմբերի 11-ը` ժամը 11:00-ից 17:00-ն: Այն բացվել է Հայկական բարեգործական ընդհանուր միության աջակցությամբ: Լուսանկարների արժեքը 50-ից 180 հազար դրամի սահմաններում է տատանվում:

ԳԱՐԻԿ ԱՎԵՏԻՍՅԱՆ

https://www.archive.azg.am/AM/2013100311