«ՇԻՐԱԿԸ» ԺԱՄԿԵՏԻՑ ՇՈՒՏ ԳՐԱՆՑԵՑ ՉԵՄՊԻՈՆՈՒԹՅՈՒՆԸ

ՈՒՂԱՐԿԵԼ ՀԵՂԻՆԱԿԻՆ

Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։

«ԱԶԳ» ՕՐԱԹԵՐԹ #73, 2013-05-04

Մարզական

«ՇԻՐԱԿԸ» ԺԱՄԿԵՏԻՑ ՇՈՒՏ ԳՐԱՆՑԵՑ ՉԵՄՊԻՈՆՈՒԹՅՈՒՆԸ

Ֆուտբոլի Հայաստանի բարձրագույն խմբի առաջնության 40-րդ տուրն անվանեց հանրապետության նոր չեմպիոնին: Ֆուտբոլի ակադեմիայի խաղադաշտում 1-0 հաշվով հաղթելով «Փյունիկին», «Շիրակն» առաջնության ավարտից 2 տուր առաջ անհասանելի դարձավ մրցակիցների համար ու պաշտոնապես գրանցեց իր չեմպիոնությունը: «Շիրակին» հաղթանակ պարգեւեց Լամին Լի Յորոն, որը 81-րդ րոպեին ստանալով աջ թեւից Լեւոն Փաչաջյանի փոխանցումը, գրավեց անպաշտպան դարպասը: «Շիրակը» 4-րդ անգամ դարձավ հանրապետության չեմպիոն: Վերջին անգամ շիրակցիները ոսկե մեդալներին արժանացել էին 1999-ին: Մայիսի 7-ին «Շիրակը» չեմպիոնի կարգավիճակում «Փյունիկի» հետ կվիճարկի Հայաստանի գավաթը:

«Շիրակի» չեմպիոնությանը նպաստեց նաեւ «Միկայի» անհաջողությունը «Բանանցի» հետ կայացած մրցավեճում: Այդ խաղը դրամատիկ ավարտ ունեցավ: 68-րդ րոպեին «Բանանցը» Սարգիս Կարապետյանի խփած գոլի շնորհիվ բացեց հաշիվը: Սակայն 81-րդ րոպեին Արարատ Առաքելյանը սեփական տուգանային հրապարակում ձեռքով խաղաց եւ Սեմյոն Մուրադյանը 11 մ հարվածով վերականգնեց հավասարակշռությունը:

Թվում էր, թե խաղը կավարտվի ոչ-ոքի, սակայն վերջին րոպեին Նաիրի Մինասյանը հաղթանակ պարգեւեց «Բանանցին»: Բարձրագույն խմբի ուղեգրի համար պայքարը խիստ սրվեց, քանի որ «Արարատի» եւ «Ուլիսի» մրցավեճում դարպասները մնացին անառիկ: Այժմ վճռորոշ կլինի հաջորդ տուրում կայանալիք «Արարատ»-«Բանանց» հանդիպումը:

Բրոնզե մեդալների համար պայքարում անչափ կարեւոր հաղթանակ տոնեց «Գանձասարը», որը հյուրընկալվելիս 2-1 հաշվով պարտության մատնեց «Իմպուլսին»: Գանձասարցիներից գոլերի հեղինակներ դարձան Արտակ Դաշյանն ու Դիակարիդիա Դումբիան, իսկ դիլիջանցիներից աչքի ընկավ Դիեգո Կաստրոն:

Մրցաշարային աղյուսակ

	Խ	Հ	Ո	Պ	Գ	Մ
1.Շիրակ	40	25	9	6	66-36	84
2.Միկա	40	23	7	10	56-39	76
3.Գանձասար	40	17	12	11	45-35	63
4.Իմպուլս	40	18	6	16	65-59	60
5.Փյունիկ	40	18	6	16	65-50	60
6.Ուլիս	40	9	12	19	35-49	39
7.Արարատ	40	9	5	26	27-66	32
8.Բանանց	40	5	15	20	36-61	30

Ռմբարկուները

Նորայր Գյոզալյան	«Իմպուլս»	22
Սեմյոն Մուրադյան	«Միկա»	18
Լամին Լի Յորո	«Շիրակ»	17
Ֆոֆանա Բեկո	«Շիրակ»	14
Անդրանիկ Բարիկյան	«Շիրակ»	12
Վիուլեն Այվազյան	«Փյունիկ»	12
Կամո Հովհաննիսյան	«Փյունիկ»	10
Արսեն Բալաբեկյան	«Ուլիս»	10

https://www.archive.azg.am/AM/2013050414