ՈՒՂԱՐԿԵԼ ՀԵՂԻՆԱԿԻՆ
Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։
ՌԱԿ ՇԻՐԱԿԻ ՄԱՐԶԱՅԻՆ ԳՐԱՍԵՆՅԱԿՈՒՄ ՀԵՐԹԱԿԱՆ ՄԻՋՈՑԱՌՈՒՄԸ ՆՎԻՐՎԱԾ ԷՐ ՔՐԻՍՏՈՆԵԱԿԱՆ ԴԱՍՏԻԱՐԱԿՈՒԹՅԱՆԸ
Այսօր արագ փոփոխվող աշխարհը նորանոր մարտահրավերներ է ծնում, որոնց դիմակայելը կենսական նշանակություն ունի հատկապես մեզ նման փոքր ածու ժողովրդի ու նրա երիտասարդ պետության համար: Արդի հասարակությունում քրիստոնեական դաստիարակության դերին էր նվիրված Ռամկավար Ազատական կուսակցության Շիրակի մարզային կառույցի կազմակերպած բանախոսություն-զրույցը, որին մասնակցեցին տեղի ուսանող երիտասարդներ, դասախոսներ, մտավորականության, արվեստի ոլորտի ներկայացուցիչներ:
Բանախոսըՙ Շիրակի հոգեւոր թեմի քրիստոնեական դաստիարակության կենտրոնի վարիչ-տնօրեն Տեր Նշան քահանա Պանֆյորովը , իր խոսքում անդրադարձ կատարելով աշխարհի ներկա իրավիճակին, նկատեց, որ նախկինում քրիստոնեական արժեքների կրող Եվրոպան այսօր արդեն այդպիսին չէ: Ըստ Տեր Հոր, այսօր աշխարհում առաջ է տարվում, տարբեր կառույցների միջոցով ժողովուրդներին պարտադրվում է մի նոր կրոնՙ մարդու իրավունքներ անվամբ: Անհատին կարեւորելն ու նրան համայնքից կտրելը, առանձնացնելը մարդկանց հեշտ կառավարելի դարձնելու նպատակ է հետապնդում: Իրենց այսօրվա տարբեր տեսակ քայքայիչ, հատկապես երիտասարդությանը տրանսֆորմացիայի ենթարկող «արժեքներն» ուզում են նաեւ մեզ պարտադրել: Դրանց կուլ չգնալու համար, բանախոսի գնահատմամբ, մենք պետք է ամուր պահենք ամենից շատ հարվածի տակ ընկնող մեր ընտանիքն ու քրիստոնեական արժեհամակարգը:
Շուրջ երեք ժամ տեւած զրույցը շարունակվեց ակտիվ հարցուպատասխանով, Աստծո պատվիրանների թեմայով ուսանողների ուժերով կազմակերպված փոքրիկ բեմականացումով:
Վերջում օգտակար զրույցի համար շնորհակալություն հայտնելով քահանա Տեր Հորը, ՌԱԿ մարզային կառույցի պատասխանատու Հովիկ Կարապետյանը նրան նվիրեց օրերս Թեքեյան մշակութային միության հրատարակած «Փանոս Թերլեմեզյան, Կյանքիս հուշերը» գիրքը: Այն լույս է տեսել Երվանդ Տեր-Խաչատրյանի աշխատասիրությամբ:
Գ. Մ.
https://www.archive.azg.am/AM/2017071426
© AZG Daily, 2008