ՈՒՂԱՐԿԵԼ ՀԵՂԻՆԱԿԻՆ
Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։
ՑԵՂԱՍՊԱՆՈՒԹՅՈՒՆ ԱՌԱՐԿԱՆ ԴԱՍԱՎԱՆԴԵԼՈՒ ՆՈՐ ՕՐԵՆՔ ՌՈԴ ԱՅԼԵՆԴՈՒՄ
Պրովիդենսի (Ռոդ Այլենդ, ԱՄՆ) Ազգային ժողովը հուլիսի սկզբին հավանություն է տվել մի օրինագծի, որը հետագայում նահանգապետ Դենիել Մկքիի ստորագրությամբ ստացել է օրենքի ուժ: Օրինագիծը, որը նախաձեռնել են Ներկայացուցիչների պալատի պատգամավոր Ռեբեկա Կիսլակն ու սենատոր Գեյլի Գոլդինը , նախատեսում է կազմել մշտական գործող մի հանձնաժողովՙ խթանելու եւ նորանոր տվյալներով համալրելու Հոլոքոսթի եւ Ցեղասպանության կրթական ծրագրերը դպրոցներում:
«Հաշվի առնելով, որ ատելությունն ու մոլեռանդությունը հանրային առօրյա քննարկումների նյութ են դարձել վերջերս, հատկապես կարեւոր ենք համարում ուսանողներին իրազեկել, որ նախապաշարմունքն ու անհանդուրժողականությունը աննկարագրելի ավերներ են գործել պատմության ընթացքում», ասել է սենատոր Գոլդինը, հավելելով, որ նոր օրենքը հնարավորություն կտա կարծիքներ փոխանակելու բռնատիրական արարքների վերաբերյալ: Գոլդինի նախնիները Արեւելյան Եվրոպայից Կանադա են ապաստանելՙ փախչելով կոտորածներից: Ընդհանրապես Ռոդ Այլենդի բնակչության մեծ մասը ներգաղթյալներ են, որոնք ճնշումների կամ հետապնդումների են ենթարկվել տարբեր երկրներում:
«Քանի որ օրեցօր ավելանում են ատելության հիման վրա կատարված հանցագործությունները, անհրաժեշտ է, որ ուսանողները տեղեկացված լինեն այն աղետալի հետեւանքների մասին, որոնք առաջանում են, երբ անհանդուրժողության սերմերն են ցանում», նշել է իր հերթին արեւելյան Պրովիդենսից դեմոկրատ պատգամավոր Քեթրին Ղազարյանը , որ օրինագծի համահեղինակներից է: Նրա նախնիներից ութը Հայոց ցեղասպանությունից փրկվածներ են եղել:
Նոր օրենքը, ըստ «Միրոր-Սփեքթեյթր» շաբաթաթերթի տեղեկության, մշտապես գործող հանձնաժողով կազմավորելով ավելի ամուր հիմքերի վրա է դնելու 2016-ին ընդունված մի այլ օրենք, որը պահանջում էր հանրային դպրոցներում հատուկ ժամեր հատկացնել Հոլոքոսթի եւ ցեղասպանությունների դասավանդմանը:
Հ.Ծ.
https://www.archive.azg.am/AM/2021090323
© AZG Daily, 2008