ՈՒՂԱՐԿԵԼ ԽՄԲԱԳՐԻՆ

Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։

ՀՀ ԿԱՌԱՎԱՐՈՒԹՅՈՒՆՈՒՄ

41,7 ՄԼՆ ԴՐԱՄ ՀԵՂԵՂՈՒՄՆԵՐԻՑ ՎՆԱՍՎԱԾ ԱՐԹԻԿԻՆ

Արթիկում տեղի ունեցած հեղեղումների հետեւանքով վնասներ կրած բնակիչներին աջակցություն ցուցաբերելու համար կառավարության որոշմամբ Շիրակի մարզպետարանին կհատկացվի 41,7 մլն դրամ: Այդ գումարի 22 մլն 350 հազար դրամը կհատկացվի վնասված շենք-շինությունների բնակիչներին, եւս 2 մլն 430 հազ. դրամ կուղղվի Արթիկում հեղեղումների հետեւանքով անկած գյուղատնտեսական կենդանիների եւ մշակաբույսերի ցանքատարածություններին պատճառված վնասի դիմաց աջակցություն ցուցաբերելու համար: Հեղեղատարների մաքրման նպատակով էլ կտրամարդվի 16 մլն 965 հազար դրամ:

Ըստ հարցը ներկայացնող տարածքային կառավարման եւ զարգացման նախարար Դավիթ Լոքյանի, քաղաքում շարունակվում են վերականգնողական ակտիվ աշխատանքները, վերացվում են հեղեղի հետեւանքները. գազամատակարարումը, ջրամատակարարումը, էլեկտրականությունը հիմնականում վերականգնվել է: Տեղերում աշխատում են շինտեխնիկա, մեքենաներ: Արդեն ավարտվում են քաղաքի երկու-երեք փողոցների մաքրման աշխատանքները:

Աջակցություն դեղագործության ոլորտի ներդրումային ծրագրին

«Ազադ Ֆարմասյութիքլզ» ՍՊԸ-ին, կառավարության երեկվա որոշմամբ կտրամադրվի գերակա ոլորտում իրականացվող ներդրումային ծրագրի շրջանակում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը եւ նյութերը ներմուծման մաքսատուրքից ազատելու արտոնություն: Ընկերությունն իրականացնելու է դեղագործական եւ բիոտեխնոլոգիական լաբորատոր հետազոտություններ, ներկրվելու են քիմիական լաբորատոր սարքեր եւ սարքավորումներ: Ծրագրի շրջանակում նախատեսվում է իրականացնել մինչեւ 10 մլն եվրոյի (մոտ 5,5 մլրդ ՀՀ դրամ) ներդրում եւ ստեղծել մինչեւ 100 նոր աշխատատեղ` 250 հազար դրամ միջին աշխատավարձով: Ծրագրով նախատեսված արտադրանքի ծավալները կկազմեն 230 մլն դրամ, որն ամբողջությամբ արտահանվելու է Շվեյցարիա:

«Մերիդիան» ազատ տնտեսական գոտում կգործի նոր ընկերություն

«ՔԵՅ ՋԻ դայմոնդ» ՍՊԸ-ին կառավարության որոշմամբ տրվեց «Մերիդիան» ազատ տնտեսական գոտու տարածքում շահագործողի կարգավիճակով ոսկերչության եւ ադամանդագործության ոլորտում գործունեություն ծավալելու թույլտվություն: Ընկերությունը 9 տարվա ընթացքում ներդրումների ծավալը խոստանում է հասցնել 7,5 մլն դոլարի: 2016թ. ընթացքում նախատեսվում է բացել 15 նոր աշխատատեղ, իսկ մոտակա 5 տարվա ընթացքումՙ ընդհանուր մինչեւ 20 աշխատատեղ` 600-800 դոլար միջին աշխատավարձով: Արտադրանքը պլանավորվում է արտահանել ՌԴ, ԱՄՆ, Կանադա, Մեծ Բրիտանիա, Սաուդյան Արաբիաՙ ծրագրի ընթացքում արտահանման տարեկան ծավալի աճը 400 հազար դոլարից հասցնելով մինչեւ 1,4 մլն դոլարի:

Փաստաթղթերը կնքելը այլեւս պարտադիր պահանջ չէ

Կառավարության երեկվա որոշմամբ ուժը կորցրած ճանաչվեցին իրավական ակտերում տնտեսվարողների կողմից փաստաթղթերը կնքված ներկայացնելու պահանջի վերաբերյալ դեռեւս առկա դրույթները: Այսպիսով, ընկերություններն ստիպված չեն լինի վճարել կնիք պատվիրելու համար գանձվող գումարը, ինչպես նաեւ կխուսափեն ավելորդ վարչարարությունից: Բացի այդ, որոշման ընդունմամբ Համաշխարհային բանկի «Գործարարությամբ զբաղվելը» զեկույցի «Ընկերությունների գրանցում» ցուցիչի դիրքը 5-րդ տեղից կբարձրանա 3-րդ տեղ, իսկ «Հեռավորությունը լավագույն արդյունքից» ցուցանիշը կաճի 1,84 տոկոսով` 97,78-ից դառնալով 99,62 տոկոս:

Ա. Մ.

https://www.archive.azg.am/AM/2016070111

© AZG Daily, 2008