ՔՈՒՐՏԸ ԱՅՆԹԱՊԻ ԻՆՔՆԱՊԱՇՏՊԱՆՈՒԹՅԱՆ ՄԱՍԻՆ

«ԱԶԳ» ՕՐԱԹԵՐԹ #20, 2018-05-25

ՔՈՒՐՏԸ ԱՅՆԹԱՊԻ ԻՆՔՆԱՊԱՇՏՊԱՆՈՒԹՅԱՆ ՄԱՍԻՆ

Ուոթերթաունի Հայկական թանգարանի եւ Թեքեյան մշակութային միության համահովանավորությամբ թանգարանի Ադել եւ Հայկ Տեր Մանուելյան դահլիճում ապրիլի 12-ին կայացել է պատմաբան դոկտ. Ումիտ Քուրտի դասախոսությունը Այնթապի 1920-21 թվերի ինքնապաշտպանական մարտերի մասին:

Քուրտը, որ բնիկ այնթապցի է, ներկայիս որպես գիտաշխատող Երուսաղեմի Վան Լիր (Van Leer) ինստիտուտի Պոլոնսկի ակադեմիայում է ձեւակերպված: Դոկտորականի գիտական աստիճան է ստացել 2016-ին Քլարկ համալսարանից: Դրանից առաջ ավարտել է Սաբանջի եւ Մերձավոր Արեւելքի Տեխնիկական համլսարանները մասնագիտանալով համապատասխանաբար եվրոպական ուսումնասիրությունների եւ քաղաքագիտության մեջ: Նա ներկայացրել է իր անգլերեն նոր գիրքը «The Heroic Battle of Aintab» (Այնթապի հերոսական մարտերը) վերնագրով, որը թարգմանությունն է 1920-21 թվերի Այնթապի իրադարձությունների ականատեսՙ Գեւորգ Բաբոյանի հայերեն հուշագրության:

«Դա սկզբնաղբյուր է, որտեղ կան խիստ ուշագրավ մանրամասներ», ասել է նա, ընդգծելով Բաբոյանի հիշատակած ազգային միասնականության գաղափարըՙ զինվորական կենտրոնական մարմնի երեք գլխավոր սյուների (Ա. Լեւոնյան, Ա. Գալեմքերյան եւ Ներսես քահանա Թավուգճյան) շուրջ: Այդ միասնականության մեջ մեծ դեր են ունեցել նաեւ հայ կանայք: Ինքըՙ Հնչակյան կուսակցության անդամ Բաբոյանը ակտիվ մասնակցություն է ունեցել հերոսամարտում եւ ի վերջո հանգրվանել Հալեպում, որտեղ հայկական դպրոցում է դասավանդել ութ տարի: Վախճանվել է Բեյրութում 1949-ին: Նրա հուշագրության անգլերեն թարգմանությունը «Կոմիտաս» հրատարակչատունն է լույս ընծայել:

Նախքան դասախոսությունը, որին ներկա են եղել այնթապցիների հետնորդները, թանգարանի գործադիր տնօրեն Ջենիֆեր Լիստոն Մանսոնը ողջունելով հյուրերին ներկայացրել է նախ թանգարանի կատարած աշխատանքները, ապա ԹՄՄ-ի Կանադայի եւ ԱՄՆ-ի շրջանակների գործադիր տնօրեն Արամ Արքունին , ով Կիլիկիայի դեպքերին կարճ անդրադարձ կատարելուց հետո, խոսքը փոխանցել է Ումիտ Քուրտին:

Հ.Ծ.

https://www.archive.azg.am/AM/2018052519