«ԱԶԳ» ՕՐԱԹԵՐԹ #27, 2016-07-15ԱԴՐԲԵՋԱՆԻ ՏՆՏԵՍՈՒԹՅՈՒՆԸ ՆՎԱԶԵԼ Է 3,4 ՏՈԿՈՍՈՎ, ԲՅՈՒՋԵԻ ԵԿԱՄՈՒՏՆԵՐԸՙ 21,4 ՏՈԿՈՍՈՎԱդրբեջանի համախառն ներքին արդյունքը 2016-ի հունվար-հունիս ամիսներին նվազել է 3,4 տոկոսով: Այս մասին հայտնել է այդ երկրի վիճակագրության պետական կոմիտեն: Նշվել է, որ վերոնշյալ տնտեսական անկումը հիմնականում պայմանավորված է շինարարության ոլորտի ծավալների 33,6 տոկոս նվազմամբ: Ոչ նավթային հատվածում արձանագրվել է 6,1 տոկոս անկում, իսկ նավթային հատվածումՙ 2,1 տոկոս աճ: Պարզաբանենք, որ ոչ նավթային հատվածում եւ հիմնականում շինարարությունում տնտեսական նման անկումը հետեւանք է այն բանի, որ այս ճյուղերում ներդրումները կատարվում են Ադրբեջանի տնտեսության հիմնականՙ նավթագազային ճյուղից ստացված եկամուտներից: Նավթի գների անկման պարագայում անհնար է դառնում այլ ճյուղերում ներդրումներ կատարելը: Ինչ վերաբերում է նավթային հատվածում արձանագրված աճին, ապա հերթական անգամ տեղեկացնենք, որ խոսքը ազգային արժույթովՙ մանաթով արտահայտված աճի մասին է, որն ավելի քան կրկնակի արժեզրկվել է: Հետեւաբար, դոլարային համադրությամբ, նկատի ունենալով դոլարով նավթի վաճառքը, նավթային հատվածում նույնպես անկում է արձանագրվել: Հարեւան երկրի մյուս տնտեսական ցուցանիշները նույնպես բարվոք չեն: Այսպես, այդ երկրի պետական բյուջեի եկամուտները կազմել են 6 մլրդ 133 մլն մանաթ, ինչը 21,4 տոկոսով պակաս է նախորդ տարվա նույն ժամանակահատվածի մուտքերից, իսկ ծախսերը կազմել են 6 մլրդ 821 մլն դրամՙ 20,5 տոկոսով պակաս նախորդ տարվա առաջին կիսամյակից: Ա. Մ. https://www.archive.azg.am/AM/2016071513 © AZG Daily, 2008 |