«ԱԶԳ» ՕՐԱԹԵՐԹ

ՀԱՅԿԱԿԱՆ ՕՐԱՑՈՒՅՑ

Հունվարի 10

Հայոց տոմարի Արաց ամսի Մուրց օրը

Ծնվել ենՙ

- Սերովբե Տերվիշյան (1846 թ., Կ.Պոլիս), լեզվաբան, հնդեվրոպաբան, Վիեննայի Մխիթարյան միաբանության վարդապետ: Հիմնել եւ խմբագրել է հայերեն առաջին լեզվաբանական հանդեսը («Լեզու»):

- Նիկողայոս Ադոնց (Տեր-Ավետիքյան, 1871 թ., Սիսիան, գ. Բռնակոթ), պատմաբան, բյուզանդագետ, բանասեր, շուրջ 80 գիտական աշխատությունների հեղինակ («Հայաստանը Հուստինիանոսի դարաշրջանում»):

- Աշոտ Մնդոյանց (1910 թ., Բաթում), ճարտարապետ, ԽՍՀՄ պետական, լենինյան մրցանակների դափնեկիր, Կրեմլի Համագումարների պալատի, Մոսկվայի Կալինինի պողոտայի կառուցապատման, Պիցունդայում առողջարանային համալիրի, Մոնրեալի համաշխարհային ցուցահանդեսում ԽՍՀՄ տաղավարի համահեղինակ:

- Ալեքսանդր Բարսեղյան (1929 թ., Բաթում), երաժշտական կոմեդիայի ժանրի ռեժիսոր, Ուկրաինայի ժող. արտիստ:

- Ավետիս Յափուճյան (1931 թ., Կահիրե), պատմաբան, մշակութային գործիչ, «Արեւ» օրաթերթի բազմամյա խմբագիր:

Տարեգրության այս օրըՙ

- 1780 թ. ազգային բարերար Հովհաննես Լազարյանը Հայաստանի ազատագրության մասին զեկուցագիր ներկայացրեց ռուս մեծ զորավար Ալեքսանդր Սուվորովին:

- 1859 թ. Ստեփան Ոսկանյանը Փարիզում հրատարակեց «Արեւմուտք» հանդեսը:

- 1863 թ. Կ. Պոլսում լույս տեսավ «Ժամանակ» կիսամսյա հանդեսը (խմբ.ՙ Ստ. Փափազյան):

- 105 տարի առաջ Թիֆլիսում լույս տեսավ «Լումա» ամսագիրը (խմբ.ՙ Գյուտ ավագ քահանա Աղայանց):

Պատրաստեց Հեղինե Ղարագուլյանը