«Ազգը» վստահություն ներշնչող աղբյուրներից տեղեկացել է, որ Ռազմավարական եւ ազգային հետազոտությունների հայկական կենտրոնը (ՌԱՀՀԿ) ֆինանսավորման խնդիրների պատճառով անորոշ ժամանակով դադարեցնում է գործունեությունը: Ինչպես հայտնի է, ՌԱՀՀԿ-ը հիմնադրել եւ ֆինանսական խնդիրները հոգացել է Հայաստանի երրորդ հանրապետության առաջին արտգործնախարար Րաֆֆի Հովհաննիսյանը:
Կենտրոնի տնօրեն Հրաչ Հակոբյանը «Ազգին» տեղեկացրեց, որ ՌԱՀՀԿ-ի գործունեության դադարեցումը ֆինանսական խնդիրներով չի պայմանավորված. «Վերակառուցվում է կենտրոնի աշխատանքների սկզբունքը, կառուցվածքը: Հավանաբար այն կտեւի մեկ-երկու ամիս»: ՌԱՀՀԿ-ի օրգան «Հայացք Երեւանից» քաղաքական, հասարակական, մշակութային վերլուծական ամսագիրն այս ամիս լույս չի տեսնի: Հ. Հակոբյանի հավաստմամբՙ ամսագիրը լույս կտեսնի փետրվարին: