Փարիզից Բաքու ժամանելով Ադրբեջանի նախագահ Հեյդար Ալիեւը հրաժարվել է մեկնաբանել Հայաստանի նախագահ Ռոբերտ Քոչարյանի այն տեսակետը, համաձայն որի «Լեռնային Ղարաբաղի հակամարտության կարգավորման համար պետք է պահպանվեն հետեւյալ նախապայմանները. ԼՂՀ-ի եւ Ադրբեջանի միջեւ իրավահավասարության, ԼՂՀ-ի անկլավային վիճակի բացառում եւ անվտանգության միջազգային երաշխիքներ»: Հ. Ալիեւը միայն նշել է, որ «դրանք դետալներ են, մինչդեռ բանակցություններում շոշափվել է հարցերի ավելի լայն շրջանակ»:
Ադրբեջանում հայտնի լրագրող-վերլուծաբան Նուրանին «Էխո» պարբերականում կարծիք է հայտնել, թե Հայաստանի առաջ քաշած երեք նախապայմաններին համաձայնելու դեպքում Բաքուն ձեռքից բաց կթողնի Ղարաբաղը. «Երբ ԼՂ-ի եւ Հայաստանի միջեւ պահպանվի ցամաքային կապը, ապա առաջին իսկ անհրաժեշտության դեպքում հայկական բանակը կհայտնվի ԼՂ-ում»:
Ադրբեջանի ընդդիմադիր քաղաքական ուժերը չափազանց բացասական անդրադարձան Քոչարյան-Ալիեւ 14-րդ հանդիպմանը: Նրանց կարծիքով, նախագահ Ալիեւը Փարիզ այցելությամբ ոչ միայն դավաճանեց Թուրքիային, այլեւ պատրաստվում է ԼՂ հարցում լուրջ զիջումների:
Թ. Հ.