Փարիզի Աստվածամոր տաճարում
ԵՐԵՎԱՆ, 30 ՀՈՒՆՎԱՐ, ԱՐՄԵՆՊՐԵՍ: Առաջին անգամ հայկական երաժշտական խումբ է հանդես գալու Փարիզի նշանավոր Աստվածամոր տաճարում: Այդ պատիվը տրվել է ժողովրդական արտիստ, պետական մրցանակի դափնեկիր Հովհաննես Չեքիջյանի ղեկավարած պետական ակադեմիական երգչախմբին: Համերգը նվիրվում է Հայաստանում քրիստոնեությունը պետական կրոն հռչակման 1700-ամյակին:
Ենթադրվում է, որ փետրվարի 13-ին այստեղ կայանալիք արարողությանը եւ համերգին ներկա են լինելու Ֆրանսիայի Հանրապետության եւ Հայաստանի Հանրապետության նախագահները:
Այդ ելույթի համար խումբը կազմել է հատուկ ծրագիր, որը հիմնականում բաղկացած է լինելու հայկական ժողովրդական երգերից: Հնչելու են նաեւ Ֆորեի, Բեռլիոզի, Գունոյի, Բախի ստեղծագործություններիցՙ երգեհոնի նվագակցությամբ:
_ Երգչախումբը Ֆրանսիայում շատ համերգներ է տվել, բայց կարծում եմ, որ Աստվածամոր տաճարում երգելը մեզ համար մեծ պատիվ է, ասաց մաեստրո Չեքիջյանը: