Դատավարության ձգձգումը չի բավարարում ԱԺ փոխխոսնակին
Նոր կուսակցությանՙ «Հանրապետության» ի հայտ գալն ըստ ամենայնի քաղաքական մյուս ուժերին սեփական դիրքորոշումները որոշակի փոփոխությունների ենթարկելու գործընթաց է խոստանում: Հասկանալի էՙ դա կատարվելու է քաղաքական մեծամասնությանՙ «Միասնություն» դաշինքի առանցքի շուրջ ոչ միայն այն պատճառով, որ «Հանրապետությունն» ըստ էության նրա սերուցքն է, այլ որ «Միասնությունն» է ներկայումս քաղաքական դաշտում ընթացող գործընթացների եւ գործադիրի պատասխանատուն, այսինքնՙ ցանկացած փոփոխություն բախվելու է դաշինքի ստատուս քվոյի պահպանման հարցին: Հարցն այժմեական գուցե չլիներ, եթե «Միասնության» մեջ միակարծություն լիներ նորաստեղծ կուսակցության հանդեպ: Եթե հանրապետականները որոշ վերապահումներով են մոտենում նրան, ապա ժողովրդականները բոլորովին չեն թաքցնում համակրանքը: «Ազգն» արդեն անդրադարձել է ՀՀԿ-ականների տեսակետներին, երբ միայն կուսակցություն ստեղծելու խոսակցություններն էին առկա: Ի դեմս ՀԺԿ անդամ, ԱԺ փոխխոսնակ Գագիկ Ասլանյանի, ներկայացնում ենք ՀԺԿ-ում տիրող տրամադրություններն ինչպես այդ, այնպես էլ հոկտեմբերի 27-ի դատավարության շուրջ:
- Պրն Ասլանյան, ՀՀԿ-ից դուրս եկած երկրապահները նոր կուսակցություն են ստեղծում: Որպես «Միասնության» ներկայացուցիչ, ինչպե՞ս եք գնահատում քաղաքական այդ գործընթացը: Չե՞ք կարծում, որ կուսակցությունն ստեղծվում էՙ հակակշռելու ձեր դաշինքին, եթե նկատի առնենք, որ ստեղծողները պնդում են, թե իրագործելու են Վազգեն Սարգսյանի եւ Կարեն Դեմիրճյանի ծրագրերը:
- Առաջնորդների ծրագրերը, պետք է շեշտեմ, ցավոք դեռեւս չեն իրագործվում: Այդ առումով կանխատեսելի էր, երբ երկրապահների քաղաքականացված մասը ստեղծում է կուսակցություն: Եվ դրա նախապայմանն էր փաստորեն «Հայաստան» խմբի ստեղծումը խորհրդարանում: Ամեն դեպքում այդ ուժի հետ համագործակցության հնարավորություն տեսնում եմ: Մենքՙ ժողովրդավարներս, Կարեն Դեմիրճյանի ծրագրերի շարունակողն ենք, եւ, կարծում եմ, նման համագործակցությունը կօգնի ընդհանուր գործերի իրականացմանը:
- Դուք փաստորեն շեշտում եք, որ ծրագրերը չեն իրագործվում: Կարելի՞ է դրանից հասկանալ, որ նոր խորհրդարանական ընտրություններին ժողովրդական կուսակցությունը կգնա «Հանրապետության» հետ դաշինք ձեւավորելով:
- Կրկնում եմ, ցավոք, այդ ծրագրերը դեռեւս չեն իրագործվում: Պատճառներ կան, որոնցից գլխավորը թերեւս տարվող կադրային քաղաքականությունն է: Իսկ ինչ վերաբերում է նման մակարդակի համագործակցությանը, ժամանակը ցույց կտա: Կուսակցությունը կստեղծվի, կհրապարակի իր կանոնադրությունն ու ծրագիրը, ըստ այդմ ՀԺԿ-ն կարտահայտի իր դիրքորոշումը: Պետք է ասեմ, որ ընդհանուր շատ բան կա մեզ անհանգստացնող. հատկապես հոկտեմբերի 27-ի դատավարությունը, ոճրագործության բացահայտման հանգամանքները, ինչպես նաեւ հանրապետությունում տիրող ներկա սոցիալ-տնտեսական իրավիճակը:
- Եթե ուշադրություն դարձնենք, Հանրապետական կուսակցության ներկայացուցիչները պնդում են, որ վաղ է հոկտեմբերի 27-ի գործում կազմակերպիչներ փնտրելը, քանի դեռ դատարանը դատավճիռ չի կայացրել: Մինչդեռ որոշ ՀԺԿ-ականներ եւ երկրապահականներ արդեն իսկ համարում են, որ առանց կազմակերպիչների հնարավոր չէ նման ոճիր իրագործել: Կարելի՞ է ասել, որ այս հարցում «Միասնությունը» հստակ դիրքորոշում չունի:
- Ես չեմ լսել, որ ՀՀԿ-ն նման հայտարարություն արած լինի: Ուզում եմ հիշեցնել «Միասնություն» դաշինքի հայտարարությունը, որտեղ հոկտեմբերի 27-ը որակվում է որպես քաղաքական հանցագործությունՙ ուղղված դաշինքի դեմ: Այդ հայտարարության մեջ ասվում էր, որ լրջորեն նախապատրաստված եւ կազմակերպված հանցագործություն է: Այնպես որ մեկ-երկուսի ասածները, եթե եղել են, կարեւոր չեմ համարում:
- Վարչապետ Անդրանիկ Մարգարյանը, ապա նաեւ «Միասնություն» խմբակցության ղեկավար Գալուստ Սահակյանը, ի պատասխան կազմակերպիչների առկայությունը հաստատող հայտարարությունների, գտնում էին, որ դրդիչների եւ կազմակերպիչների մասին իմացող չհայտնողները պետք է քրեորեն պատժվեն:
- Ես էլ եմ գտնում, որ եթե կան մարդիկ, որոնք գիտեն, որ կան կազմակերպիչներ եւ մտածված չեն հայտնում, պիտի պատասխանատվության ենթարկվեն, որովհետեւ դա ոչ միայն զոհվածների հարազատներին կամ քաղաքական կուսակցություններին է առնչվում, այլեւՙ մեր հանրապետության եւ ողջ ժողովրդի խնդիրն է: Դրա համար էլ սպասելիքները դատարանից մեծ են: Անհրաժեշտություն է, որ դատավարության ավարտին ժողովուրդը հավատա վերջնական դատական եզրակացությանը:
- Դուք նշեցիք, որ ձեզ մտահոգում է դատավարության ներկա ընթացքը: Կոնկրետ փաստե՞ր նկատի ունեք:
- Նախաքննության համար միանշանակ կարող եմ ասել (ի դեպ, դա բոլորի կարծիքն է), որ խիստ թերի էր: Դրա հետեւանքներն արտահայտվում են հիմաՙ դատավարության ընթացքում: Կարծում եմ, դատավորը պետք է ոչ մի տեղ չունենար կառչելու այս կամ այն էպիզոդից, որպեսզի ընթացքը ձգձգվեր: Նմանատիպ երեւույթներն ավելի են գրգռում ժողովրդին: Ինչ խոսք, ներկա ընթացքը ինձ չի կարող բավարարել:
- Օրեր առաջ ՀԿԿ ներկայացուցիչ Գագիկ Թադեւոսյանը չժխտեց, որ ՀԺԿ-ի եւ Ազգային միասնություն կուսակցության հետ ձախ ուժերը համախմբելու նպատակ կա, որին միանալու ձգտում ունեն նաեւ երկրապահները, որոնք աջ ուղղվածության գաղափարակիր են:
- Գագիկ Թադեւոսյանն ինքը կարող է մեկնաբանել իր հայտարարությունը: Մենք իրոք եղել եւ մնում ենք կենտրոնամետ ուժ եւ կհամագործակցենք բոլոր այն քաղաքական ուժերի հետ, որոնց հետ ընդհանուր շփման եզրեր կգտնենք:
ԳՈՌ ԱԲՐԱՀԱՄՅԱՆ