Լիբանանի Հանրապետության նախագահ, գեներալ Էմիլ Լահուդը մայիսի 2-4-ը պաշտոնական այցով ժամանելու է Երեւան, ուղեկցությամբ հայ եւ արաբ պետական ու քաղաքական դեմքերից կազմված պատվիրակության: Այս մասին «Ազգը» տեղեկացավ Հայաստանում Լիբանանի դեսպանությունից, իսկ ՀՀ արտգործնախարարությունից տեղեկացրին, որ այցի մանրամասնությունները դեռեւս համաձայնեցման փուլում են գտնվում եւ առաջիկա օրերին կներկայացվեն հանրությանը:
Մինչ այդ Արմենպրեսը տեղեկացնում է, որ Լիբանանում Հայաստանի դեսպան Արման Նավասարդյանն օրերս եղել է Լիբանանի փոխվարչապետ Իսամ Ֆարեսի մոտ եւ քննարկել գեներալ Էմիլ Լահուդի այցի հետ կապված հարցեր եւ այդ համատեքստումՙ երկու երկրների միջեւ տնտեսության, ֆինանսական համակարգի, զբոսաշրջության, առողջապահության եւ այլ բնագավառներում համագործակցության զարգացման հեռանկարները: