Ուզում են հավատացնել, թե «Հոկտեմբերի 27-ի» գործի տերը «Միասնությունն» է
Ամբաստանյալ Նաիրի Հունանյանի անվտանգությունն ապահովող իրավապահների գործունեությունն ուսումնասիրող ԱԺ ժամանակավոր հանձնաժողով ստեղծելուն դեմ կամ կողմ արտահայտվելով, դրա անհրաժեշտությունը ճշտելով, ե՚ւ քաղաքական շրջանակները, ե՚ւ հասարակությունը մոռացան, որ «Միասնություն» դաշինքն ի սկզբանե հայտարարել էր, թե ինքն է «Հոկտեմբերի 27-ի» գործի տերը: Դա հաստատելու համար դատավարությանը հետեւելու նպատակով նախօրոք խումբ էր կազմվել, որի գնահատականները մինչեւ վերջերս դատավարության ընթացքի մասին դրական էին: Արդյոք ի՞նչը կարող էր հիմք դառնալ դատավարության շուրջ ձեւավորված մթնոլորտին եւ ընթացքին առնչվող նման որակումներով հայտարարության համար. փորձեցինք պարզել ԱԺ «Միասնություն» խմբակցության ղեկավար, ՀՀԿ խորհրդի անդամ Գալուստ Սահակյանից:
- Պարոն Սահակյան, երբ նոր էր սկսվել «Հոկտեմբերի 27-ի» դատավարությունը, խորհրդարանն իր վերահսկողությունն իրականացնելու համար, որպես տուժող կողմ, առանձին խմբեր կազմավորեց, որոնցից առանձին նշանակություն ուներ «Միասնության» ստեղծածը, որպես քաղաքական մեծամասնություն: Այդ խմբի մեջ վերջին շրջանում դատավարության ընթացքի առնչությամբ տարաձայնություններ եղե՞լ են հանրապետականների եւ ժողովրդականների միջեւ:
- Որեւէ տարաձայնություն չի եղել, որովհետեւ խումբը խնդիր էր դրել հետեւելու, որպեսզի դատավարությունն ընթանա օրինական դաշտում: Այս երեք ամսվա ընթացքում ո՚չ մեր, ո՚չ էլ մեր կողմի դատապաշտպանների կողմից օրինականության խախտման որեւէ արձանագրում չի եղել: Այստեղ ես գնահատելի եմ համարում ե՚ւ «Միասնություն» խմբակցության, ե՚ւ նրա կազմած խմբի աշխատանքը: Երեք ամսվա ընթացքում ձեւավորվել է որոշակի զազրախոսություն, որը մեզ համար տանելի չէ: Որպես պատգամավոր, որպես քաղաքական գործիչ գտնում եմ, որ դատավարությունը պիտի օրինականության սահմաններում ընթանա: Բայց որպես քաղաքացի կրքերի տեսակետից մտածում եմ ինչպես ժողովուրդը, որ կարելի է միանգամից վերցնել եւ սատկեցնել բոլորին:
- Նախքան տեքստի խմբագրումը, ինչպես մեզ էին ներկայացնում ՀԺԿ-ականները, հայտարարությունը չպետք է ներկայացվեր լայն հասարակությանը, մինչդեռ անմիջապես հայտնվեց «Առավոտի» էջերում, իհարկե նախնական տարբերակով: Որպես «Միասնություն» խմբակցության ղեկավար ի՞նչ եք կարծում, ինչ էր նշանակում հայտարարության շուտափույթ հրապարակումը:
- Դա ըստ երեւույթին ՀԺԿ-ի կոնֆերանսների հետեւանք էր, որ հանրությունն ուզում է տեսնել, թե ինչով է միջամտում «Միասնությունը»: Այսինքն սա տարբերակ է, որ եւս մեկ անգամ հանրությանն ապացուցի, թե այդ գործի տերը մենք ենք: Բայց միեւնույն ժամանակ պետք է ասեմ, որ քաղաքական այն ուժը, որն այսօր իշխանություն ունի (ի դեմս վարչապետի եւ ԱԺ նախագահի) հայտարարություն անելով, ո՞ւմ դեմ է դուրս գալիս եւ ո՞ւմ համար, երբ ուժն ու իշխանությունը հենց իր ձեռքում է: Եթե որեւէ կասկածներ կան եւ դրանք հիմքեր ունեն, խնդրեմ, մենք կարող ենք դա անել սովորական աշխատանքային կարգով, օրենքների շրջանակներում:
- Նախքան հանձնաժողով ստեղծելու հայտարարությամբ ի հայտ գալը, դուք համոզմունք էիք հայտնում, թե հանրապետականներին եւ ժողովրդականներին հաջողվել է լուծել որոշ սկզբունքային հիմնախնդիրներ, որոնք ծագել էին դաշինքի ներսում: Ըստ ձեզ, դա հանրապետականների զիջողականության հետեւանք էր, հանուն երկրում կայունության հաստատման: Արդյոք այս հայտարարությամբ փորձ չարվե՞ց խարխլելու կարկատած կայունությունը:
- Չէի ասի, որ այս խնդրում ընդհանրապես բախումներ եղել են, որովհետեւ դաշինք հասկացողությունը չի նշանակում մեկ կուսակցություն: Յուրաքանչյուր կուսակցություն բացի ունեցած պայմանավորվածություններից կարող է ինքնուրույն հայտարարություններ անել, իր խնդիրներն առաջ քաշել: Այնպես որ համեմատություններ չի կարելի անել:
- Դուք հայտարարում էիք, որ դաշինքն է գործի տերը եւ որ ՀԺԿ-ն ու ՀՀԿ-ն միակարծիք են: Մինչդեռ հիմա ժողովրդականներն առանձին են հանդես եկել, ընդ որում չստանալով հանրապետականների դրական վերաբերմունքը, ինչպես կարելի է ենթադրել ձեր խոսքերից: Կարելի՞ է կարծել, թե «Հոկտեմբերի 27-ի» գործում հստակ պայմանավորվածություններ երկու կողմերի միջեւ այնուամենայնիվ չեն եղել:
- Ոչ թե չեն եղել, այլ ե՚ւ մենք, ե՚ւ ժողովրդականները, ե՚ւ ողջ ժողովուրդն է շահագրգիռ դատավարության արդարացի ելքով:
- Հայտարարությանը դեմ եք արտահայտվում, մինչդեռ գրեթե ողջ կազմով կողմ քվեարկեցիք ժամանակավոր հանձնաժողով ստեղծելուՙ ՀԺԿ-ի, երկրապահականների եւ կոմունիստների նախագծին: Եթե դեմ եք դրա ձեւավորմանը մեխանիզմների անորոշության պատճառով թեկուզ, ապա ինչո՞ւ քվեարկությամբ կողմ արտահայտվեցինք եւ չխոչընդոտեցիք արտահերթ նիստ գումարելուն:
- Հայտարարությանը դեմ էինքՙ դեմ լինելով բնորոշումներին եւ հանձնաժողովի անելիքները չպատկերացնելու պատճառով: Սակայն, եթե հանձնաժողով է կազմվում, որտեղ հրավեր ունենք, մեր պատասխանատվության դրսեւորումը պիտի ունենանք:
ԳՈՌ ԱԲՐԱՀԱՄՅԱՆ