ՄՈՍԿՎԱ, 23 ՄԱՅԻՍ, ԱՐՄԵՆՊՐԵՍ: ՌԴ նախագահ Վլադիմիր Պուտինը մայիսի 31-ին կմասնակցի Հայաստանի, Ադրբեջանի, Վրաստանի եւ Ռուսաստանի պետությունների ղեկավարների հերթական հանդիպմանը, որը տեղի կունենա Մինսկում ԱՊՀ-ի պետությունների ղեկավարների խորհրդի նիստի շրջանակում: Ինչպես այսօր ԻՏԱՌ-ՏԱՍՍ-ի թղթակցին հայտնեցին ՌԴ նախագահի մամլո ծառայությունում, ենթադրվում է, որ երկրների ղեկավարները կքննարկեն տարածաշրջանում անվտանգության եւ համագործակցության ընդլայնման հրատապ հարցերը, ինչպես նաեւ «կովկասյան քառյակի» երկրների միջեւ հարաբերությունների զարգացման հեռանկարները:
Հանդիպման ընթացքում ծրագրվում է նաեւ քննարկել «Խաղաղությունը եւ զարգացումը Կովկասում» գիտագործնական խորհրդաժողովի արդյունքները, որը չորս պետությունների ղեկավարների նախաձեռնությամբ մայիսի 28-29-ը Մոսկվայում կազմակերպում է Ռուսաստանի գիտությունների ակադեմիան: