Վերջերս լուրեր էին շրջում, թե այս տարվա հոկտեմբերին նախատեսված մարդահամարի համար սպասվող գումարները չեն ստացվում եւ այն գուցե տապալվի: Այդ հարցի առնչությամբ «Ազգը» դիմեց ֆինանսների եւ էկոնոմիկայի նախարար Վարդան Խաչատրյանին, որն ասաց հետեւյալը.
- Մարդահամարի անցկացումը մի քանի տարի շարունակ ծանր խնդիր էր կառավարության համար: Անհրաժեշտ էին մեծ գումարներ: Այս տարի դրա անցկացման քաղաքական որոշումն ընդունվեց: Ինչո՞ւ: Կառավարությանը դոնոր երկրները հավաստեցին, որ եթե 400 հազ. դոլար (նախապես 200 հազ.) հատկացնի, մյուս 1,1 մլն դոլարը կհայթայթվի: Կառավարությունն այդ գումարը գտավ: Անգլիայի կողմից հիմնական 1 մլն դոլարը կարծես թե տրվել է: 20 հազ. դոլար եւս կառավարությունը հատկացրեց SATAC-II վարկիցՙ քարտեզագրման աշխատանքների համար: Այժմ պահանջ է դրվում, որ չբավարարող լրացուցիչ գումարը եւս SATAC-II-ից հատկացվի: Ես կտրականապես դեմ եմ դրան, որովհետեւ չնայած վարկ լինելուն, այդ գումարները բյուջետային են: Այժմ կարծես Շվեյցարիան է պատրաստակամություն հայտնել լրացուցիչ գումար հատկացնել, եւ կարծես թե որեւէ խնդիր այլեւս չի լինի:
Մարդահամարը, չնայած կարող է որոշ հետեւանքների բերել, մեզ համար կարեւոր է:
Ա. Մ.