Հայաստանում են Լոս Անջելեսի Թեքեյան մշակութային միության «Արշակ Տիգրանյան» վարժարանի 20 շրջանավարտներըՙ Թեքեյան մշակութային միության Կենտրոնական վարչության գործադիր մարմնի քարտուղար, հայոց գրականության եւ պատմության ուսուցչուհի, շրջապտույտի պատասխանատու օրիորդ Լորա Գույումջյանի գլխավորությամբ: Մեկ շաբաթվա ընթացքում շրջանավարտներն այցելեցին Հայաստանի տեսարժան վայրեր, մասնակցեցին մի շարք միջոցառումների, իսկ երեկ ՀԹՄՄ վարչության անդամների ուղեկցությամբ այցելեցին Արագածոտնի մարզի, Կարբի գյուղի Վահան Թեքեյանի անունը կրող կրթօջախ:
Դպրոցի մուտքի առաջ նրանց աղ ու հացով դիմավորեցին ուսուցչական կոլեկտիվը, աշակերտները, որոնք հյուրերի պատվին պատրաստել էին համերգային ծրագիր: Կարբիի Վ. Թեքեյանի անվան այս կրթօջախի ընտրությունը որոշել էր ԹՄՄ Կենտրոնական վարչությունը, որը մեկ տարվա ընթացքում հանգանակել էր որոշակի գումարՙ դպրոցի ուսուցիչների ու սպասարկող անձնակազմի համար: Մինչ հյուրերը ըմբոշխնում էին համերգը, օրիորդ Լորան ՀԹՄՄ-ի գանձապահ Գայանե Մուրադյանի եւ կրթօջախի տնօրեն Արսեն Օհանյանի ներկայությամբ դպրոցի մանկավարժներին եւ աշխատակիցներին հանձնեց օգնության գումարները: Հրաժեշտից առաջ ՀԹՄՄ վարչության անդամ Կառլեն Դալլաքյանը ողջունելով հյուրերին, կարեւորեց այսօրվա դպրոցի պահպանումըՙ հատկապես գյուղական վայրերում, որով էլ նաեւ հնարավոր կլինի հայաթափությունից փրկել հայկական գյուղերը:
ՄԱՐԻԵՏԱ ՄԱԿԱՐՅԱՆ