ՌԴ փոխվարչապետը ժամանեց Երեւան
«Հայաստանի հետ քաղաքական փոխհարաբերությունները մենք գնահատում ենք իդեալականին մոտ, մյուս բոլոր հարաբերությունները շատ բարձր մակարդակի վրա են»: Այս հայտարարությունը երեկ արեց Ռուսաստանի փոխվարչապետ Իլյա Կլեբանովըՙ ժամանելով Երեւան երկօրյա աշխատանքային այցով: Նա գլխավորում է Հայաստանի հետ տնտեսական համագործակցության միջկառավարական հանձնաժողովի ռուսաստանյան մասը:
Փոխվարչապետի կարծիքով, «պետք է առաջ քաշել մեր տնտեսական կապերը»: «Դա մեր այցի գլխավոր մասն էՙ մեր տնտեսությունների ինտեգրումը, ռուսաստանյան ներդրումներն ու այն ամենը, ինչ դրա հետեւում է», հայտարարեց Իլյա Կլեբանովը: Նրա խոսքերովՙ «մեր տնտեսությունների իրական ինտեգրումն այն գլխավոր խնդիրն է, որ մենք պիտի լուծենք մոտակա ժամանակահատվածում:
Ինչպես հույս ունի ՌԴ փոխվարչապետը, տնտեսական համագործակցության հարցերը կլինեն ՌԴ նախագահ Վլադիմիր Պուտինի սեպտեմբերին Հայաստան կատարելիք այցի գլխավոր խնդիրը: Մեր ժամանումն այդ այցի նախապատրաստման ավարտական փուլի սկիզբն է, հայտարարեց փոխվարչապետը:
Հայաստանում գտնվելու օրերին Իլյա Կլեբանովը կայցելի Զանգեզուրի պղնձամոլիբդենային կոմբինատ եւ Երեւանի «Մարս» գործարան: «Ռուսաստանը ներդրումներ կանի այդ ձեռնարկություններում», հայտնեց փոխվարչապետը:
Ռուսաստանը ցանկություն ունի մասնակցել Իրան-Հայաստան գազամուղի կառուցմանը, շարունակեց Իլյա Կլեբանովը: Գազամուղի կառուցմանը ՌԴ մասնակցելու հարցը կքննարկվի ՀՀ նախագահի ու վարչապետի, միջակառավարական հանձնաժողովի հայաստանյան գործընկերների հետ: Մենք գտնում ենք, որ այդ նախագիծը պետք է կյանքի կոչել մասնակից բոլոր երկրների ջանքերով, այդ թվում Ռուսաստանի մասնակցությամբ: Գազամուղի նախագիծը շատ կարեւոր նշանակություն ունի Հայաստանի տնտեսության համար, վստահ է Իլյա Կլեբանովը:
Անդրադառնալով «Կովկաս» լաստանավային տրանսպորտային նավահանգստի ստեղծման գործընթացին, Իլյա Կլեբանովը հայտնեց, որ մի քանի օր հետո ՌԴ կառավարությունը հատուկ խորհրդակցություն է անցկացնելու հայաստանյան ու վրաց ներկայացուցիչների մասնակցությամբ:
Այդ հանդիպումն առանցքային է լինելու, դրանից պիտի սկսվի տրանսպորտային համակարգի ձեւավորումը, նշեց ՌԴ փոխվարչապետը: Խորհրդակցությունից հետո պարզ կդառնան ժամկետները, ներդրումները, ասաց պրն Կլեբանովը:
Երեւան ժամանելով, ՌԴ փոխվարչապետն ուղղաթիռով մեկնեց Քաջարան, ուր այցելեց Զանգեզուրի պղնձամոլիբդենային կոմբինատ:
ՏԻԳՐԱՆ ԼԻԼՈՅԱՆ, ԻՏԱՌ-ՏԱՍՍ-ի թղթակից «Ազգի» համար