ՄՈՍԿՎԱ, 19 ՀՈՒԼԻՍ, ԱՐՄԵՆՊՐԵՍ: Ինչպես հաղորդել է թուրքական «Սաբահ» լիբերալ թերթը, Թուրքիայի Ազգային մեծ ժողովի խոսնակ Օմեր Իզգին հրաժարվել է պատասխան այցի շրջանակներում Պետդումայի նախագահ Գենադի Սելազնյովի հրավերով այցելել Ռուսաստան, ինչը բացառիկ դեպք է երկկողմ խորհրդարանական հարաբերություններում:
Թուրքիայի խորհրդարանական պատվիրակության այցի ծրագրի նախապատրաստման ընթացքում վերջինս ցանկություն է հայտնել հանդիպում ունենալ նախագահ Վլադիմիր Պուտինի եւ վարչապետ Միխայիլ Կասյանովի հետ, ինչը կհաստատեր թուրք-ռուսական հարաբերությունների բարձր մակարդակը: Սակայն ռուսաստանյան կողմից մերժում է հետեւել այն պատճառաբանությամբ, որ «խորհրդարանների խոսնակների հետ Ռուսաստանի նախագահի հանդիպումներն ավանդույթ չեն»: Դրան ի պատասխան թուրքական կողմը հայտարարել է, որ Ռուսաստանի խորհրդարանի ստորին պալատի ղեկավարի ավելի վաղ կայացած այցի ընթացքում նրան ընդունել է Թուրքիայի նախագահ Ահմեդ Սեզերը: «Ռուսաստանցի գործընկերների վերաբերմունքից խիստ դժգոհ» Օմեր Իզգին անհրաժեշտ է համարել չեղյալ հայտարարել իր պատասխան այցը Ռուսաստանի մայրաքաղաք: