Կառավարությունն ամեն առիթով հայտարարում է, որ երկրում ներդրումային միջավայրի բարելավումը իր կարեւորագույն խնդիրն է: Դրա համար համաժողովներ են կազմակերպում նյույորքներում ու փարիզներում: Բայց ներդնողներին հրապուրելու գործը առաջին հերթին պետք է արվի երկրի ներսում: Այս օրերին ահա Հայաստանում տեղի է ունենում է մի գործընթաց, որը կարող է ի չիք դարձնել բոլոր այդ համաժողովներըՙ գումարած հանդիպումները ամեն տեսակի հեղինակավոր ներդնողների հետ:
Լրատվամիջոցներին հաղորդվել է հետեւյալը. Կապանում գտնվող «Կապանտրանս» ԲԲԸ մասնավոր ձեռնարկությունը որոշել է իր սարքավորումը (թե նրա մի մասը) վաճառել: Սարքավորումը կազմաքանդվել է եւ բեռնատարներով տեղափոխվել դեպի Վրաստան: ՀՅԴ Կապանի «Արամ Մանուկյան» կոմիտեն բողոքի ակցիա է կազմակերպել, մի քանի ժամով փակել Երեւան-Կապան միջպետական մայրուղին ու կասեցրել փոխադրումը: Գործողությունը հիմնավորվել է նրանով, որ Կապանը եւ Սյունիքը ունեն ասֆալտի մեծ կարիք:
Եթե այս ամենը համապատասխանում է իրականությանը, ապա կարելի է առանց կասկածի պնդել, որ ոչ մի Նյու Յորք կամ Փարիզ մեզ չի օգնի: Որքան էլ բարի լինեն Կապանի գործողությունների նախաձեռնողների նպատակները, պարզ է մի բան, նրանք խոչընդոտում են սեփականատիրոջը տնօրինելու իր ունեցվածքը: Գործարանի սեփականատերը պարտավոր չէ մտածել Կապանի ասֆալտի մասին, եթե նա հարմար է գտնում, կարող է այդ գործարանը քադել ու տեղում հիմնադրել լողավազան կամ տիեզերակայան: Ինչպես բողոքի ակցիայի ամեն մասնակից իրավունք ունի անարգել վաճառելու իր տունը կամ ավտոմեքենան:
Եվ ամենավատն այն է, որ իշխանությունները քայլեր չեն ձեռնարկում, որ պահպանվի ազատ հասարակության ու տնտեսության հիմքերի հիմքըՙ սեփականության իրավունքը: Մարզպետը, համաձայն նույն աղբյուրների, ոչ միայն միջոց չի ձեռնարկել սեփականության իրավունքի իրացման խոչընդոտները վերացնելու համար, այլեւ ոստիկանների է կանգնեցրել գործարանի դարպասի մոտ, որ բեռնատարները դուրս չգան: Ու խնդիրը, չգիտես ինչու, երրորդ օրն է, ինչ քննարկվում է տրանսպորտի եւ հեռահաղորդակցության նախարարությունում: Ի՞նչ գործ ունի այս նախարարությունը: Եթե կա պետական մարմին, որ այստեղ անելիք ունի, դատախազությունն է:
Այնպես որ, հարգելի կառավարություն, գոնե նյույորքներ գնալուց հետո մի քիչ ուշադրություն դարձրեք մեր կապաններին: Ո՞ր ներդնողը կգա ու այստեղ փող կդնի, եթե պետությունը չի երաշխավորում, որ նա իր ունեցվածքի տերը կլինի:
ՀԱՐՈՒԹՅՈՒՆ ԽԱՉԱՏՐՅԱՆ