Մարզեր այցելությունների կուսակցական ծրագրի շրջանակներում երեկ ՀՌԱԿ փոխատենապետ Հարություն Առաքելյանը, Հանրապետական վարչության անդամ Գառնիկ Հովակիմյանը, «Այգեստան» ակումբի ատենապետ Արմեն Ստեփանյանն այցելեցին Արթիկ: Տեղի ՀՌԱԿ մասնաճյուղի գրասենյակում հանդիսավորապես բացվեց «Արթիկ» ակումբը: ՀՌԱԿ ղեկավարությունն արթիկցի ռամկավարներին հանձնեց կուսակցական տոմսերը, այնուհետեւ տեղի ունեցավ նորագիր անդամների երդմնառության արարողությունը: Ակումբի անդամներին ողջույնի խոսքով դիմեցին Հարություն Առաքելյանն ու Գառնիկ Հովակիմյանը: ՀՌԱԿ փոխատենապետը, շնորհավորելով Արթիկի իր կուսակցական ընկերներին ակումբի բացման կապակցությամբ, մասնավորապես նշեց, որ այսօրվա քաղաքական դաշտը կարիք ունի առողջ ու կառուցող ուժի, իսկ այդ ներուժը կա, պարզապես սպասում է բարենորոգիչ մտահղացումներն իրականացնելու իր ժամին: «Կանենք ամեն հնարավորըՙ մեզ հավատացող եւ մեզ հետ քաղաքական դաշտով ընթացող մարդկանց հուսախաբ չթողնելու», հավաստիացրեց նա: ՀՎ անդամ Գառնիկ Հովակիմյանն իր հերթին նշեց, որ կուսակցությունն այսօր, ավելի քան երբեւէ, ուժով առլեցուն է, քանզի միասնական է թե՚ Հայաստանում եւ թե՚ սփյուռքում, ներքին հակասությունները հարթված են:
Ապա տեղի ունեցան ակումբի վարչության կազմի եւ ատենապետի ընտրությունները, վարչության նորընտիր անդամների կամքով ատենապետ դարձավ Մ. Պետոյանը:
ՀՌԱԿ փոխատենապետն ու իր ուղեկիցներն այցելեցին նաեւ Գյումրի, եղան տեղի ՀՌԱԿ մասնաճյուղի գրասենյակում, ինչպես եւ Վահան Թեքեյանի անվան միջնակարգ դպրոցում: 2000 թ. հոկտեմբերից շահագործման հանձնված այս դպրոցը, որ համապատասխանում է արտասահմանյան առաջնակարգ դպրոցների չափանիշներին, կառուցվել է ամերիկացի մեծահարուստ Ջոն Հանթսմանի միջոցներով: Դպրոցը գտնվում է անմիջապես այն թաղամասի հարեւանությամբ, որ կոչվում է իրՙ Հանթսմանի անունով, եւ որտեղ այժմ առաջին բնակելի շենքերն են կառուցվում: Թեքեյանի անվան դպրոցի տնօրեն Անտոն Փիլոյանի ջանքերով (նա նաեւ Գյումրիի ՀՌԱԿ մասնաճյուղի եւ դրանում ընդգրկված 5 ակումբների ղեկավարն է) այս կրթական հաստատությունը կարճ ժամանակամիջոցում, տարբեր բարերարների միջոցով, ապահովվել է դպրոցական կահույքով, մարզագույքով, աշակերտների ուսման ու հանգստի համար ստեղծվել են անհրաժեշտ բոլոր պայմանները: Ներկայումս աշակերտների թիվը 450 է, նրանց առաջադիմության ցուցանիշը, տնօրենի խոսքերով, գոհացուցիչ է: Հատկանշական է, որ այստեղ գնահատում են ունեցածը, քանի որ լավագույնս պահպանում են ու խնամք տածում: «Գյումրին երկրորդ այսպիսի դպրոց չունի», արդար հպարտությամբ նշեց տնօրեն Ա. Փիլոյանը: Մեր անունից ավելացնենք, որ Երեւանում էլ հազիվ թե գտնվի երկրորդ այդպիսին.
Ա. ԲԱԲԱՅԱՆ