Ըստ նախնական տեղեկատվության, սպասվում է, որ այսօր Բեռնի (Շվեյցարիա) առաջին ատյանի դատարաններից մեկում ընթացող 17 թուրքերի դեմ բացված դատը հասնի ավարտին: Դատավոր Լինհարդ Օչսները պետք է վճռի, թե իրո՞ք խախտվել է երկրի քրեական օրենսգրքի այն կետը, որ նշում է, թե մարդկային որեւէ ոճիր չի կարելի ո՚չ հերքել, ո՚չ մեղմացնել եւ ո՚չ էլ պատճառաբանել: Սակայն մինչ այդ անգլիական «Դեյլի թելեգրաֆ» թերթը հայտնում է, որ շվեյցարացի դատախազները միացել են թուրքերին ազատ արձակելու պաշտպանող կողմի իրավաբանների պահանջներին:
Դրանից առաջ Բի-Բի-Սի ռադիոկայանը հայտնել էր, որ Շվեյցարիայում թուրքական դեսպանատունը ուշի ուշով հետեւելու է դատական լսումներին:
Հիշեցնենք, որ թուրքերի դեմ դատը բացել էին հայ-շվեյցարական ընկերության 2 անդամներ, որոնք թուրքերին մեղադրում էին Հայոց ցեղասպանությունը հերքելու եւ դրանով իսկ Շվեյցարիայի քրեական օրենսգիրքը խախտելու մեջ: