Կյանքի զարգացման տրամաբանությունը, բնականաբար, էական փոփոխություններ է առաջ բերել նաեւ Ամերիկայի Հայ օգնության ֆոնդի ծրագրերում: Մարդասիրական օգնությունն իր տեղը զիջել է զարգացման ծրագրերին: Այսպես, արդեն ավարտված է ՀՕՖ-ի լայնածավալ սննդի ծրագիրը, թեեւ կազմակերպությունն ամեն ինչ անում է բարեգործական 12 ճաշարանների նորմալ գործունեությունն ապահովելու համար: Դրանք Երեւանից բացի գործում են նաեւ Նոր Հաճընում, Ազատավանում, Գորիսում, Եղեգնաձորում, Մեղրիում եւ այլուր: Գյումրիում այս տարի բացվեց միայնակ տարեցների կենտրոնը, որտեղ ոչ միայն սնվում, այլեւ անվճար բուժօգնություն են ստանում 200 միայնակ ծերեր:
Դպրոցաշինությունից եւ բժշկական աջակցությունից զատ, ՀՕՖ-ի ուշադրության կենտրոնում այսօր գիտակրթական տարաբնույթ ծրագրեր են: Այս տարի 22 գիտական թեմաների հատկացվեց 5000-ական դոլար դրամաշնորհ, իսկ եկող տարվա համար արդեն կատարվում է ընտրություն:
Հասարակական մեծ հնչեղություն ունի «Մաթեւոսյան կրթավճար» ծրագիրը, որի շրջանակներում բարեգործական այս կազմակերպությունն արդեն 50 ուսանողի է հովանավորում պետական բուհերի վճարովի ուսուցման հետեւյալ ֆակուլտետներումՙ իրավաբանական, միջազգային հարաբերություններ եւ տնտեսագիտական: Օրերս հայտնի դարձան այն 10 առաջին կուրսեցիները, որոնք այս տարի ընդգրկվեցին ծրագրում: Որպես չափանիշներ հաշվի են առնվել նրանց սոցիալական վիճակը եւ բարձր առաջադիմությունը:
ՀՕՖ-ը պատշաճ ուշադրության է արժանացնում նաեւ մանկատների չափահաս դարձած սաներինՙ օգնելով նրանց կրթությունը շարունակելու հանրապետության վարժարաններում եւ քոլեջներում:
Ասուլիսի ժամանակ առաջին անգամ ցուցադրվեցին մանկական այն շքեղ ալբոմները, որոնք հրատարակվել են ՀՕՖ-ի նվիրատվությամբ եւ նվիրված են քրիստոնեությունը Հայաստանում պետական կրոն հռչակելու 1700-ամյակին:
Ամերիկայի Հայ օգնության ֆոնդը, որի կենտրոնական գրասենյակը գտնվում է Նյու Յորքում, Հայ Առաքելական եկեղեցու ԱՄՆ-ի Արեւելյան թեմի առաջնորդարանի հետ համատեղ արդեն 15.000 դոլար է փոխանցել պայթեցված շենքերի վերաշինության եւ ահաբեկչական այդ գործողություններից տուժածներին օգնություն ցուցաբերելու համար: Հատուկ այդ նպատակով ՀՕՖ-ը հաշիվ է բացել, որին իրենց նվիրատվությունները կարող են փոխանցել ամերիկահայ համայնքի ներկայացուցիչները: Ն. Ի.