Իոն Իլիեսկուն մայր բուհում
Երեկՙ Հայաստան կատարած իր պաշտոնական այցի երկրորդ օրը Ռումինիայի նախագահ Իոն Իլիեսկուն Էջմիածնում արժանացավ Ամենայն հայոց կաթողիկոսի ընդունելությանը: Եղավ Ծիծեռնակաբերդում:
Չխախտելով այս տարի իրար հաջորդած բարձրաստիճան պաշտոնական այցերի արդեն ավանդական ծրագիրը, Իոն Իլիեսկուն այնուհետեւ հյուրընկալվեց ԵՊՀ-ում:
ԵՊՀ ռեկտոր Ռադիկ Մարտիրոսյանն, ընդունելով բարձրաստիճան հյուրին, իր երախտագիտությունը հայտնեց ռումին ժողովրդինՙ իրենց երկրում եղեռնից մազապուրծ հայերին ընդունելու համար: Հիշելով Ռումինիայում հայ ավանդական գաղութըՙ Ռ. Մարտիրոսյանն առանձնացրեց երջանկահիշատակ Վազգեն 1-ին Ամենայն հայոց կաթողիկոսին, որ ծնվել եւ նախապես գործել է հենց այդ երկրում: Իր ողջույնի խոսքը ռեկտորն ամփոփեց նախագահին ԵՊՀ պատվավոր դոկտորի կոչում շնորհելով:
Իոն Իլիեսկուն համալսարանի ուսանողներին եւ դասախոսներին իր դիմումն սկսեց ռուսերենՙ հիշեցնելով, որ հայ-ռումինական կապերն առնվազն վեցդարյա պատմություն ունեն, երբ 600 տարի առաջ հայոց եկեղեցի եւ հոգեւոր տուն հիմնվեցին պատմական Ռումինիայի տարածքում: Այդ երկրում հայ համայնքի այսօրվա կենսապայմանների վերաբերյալ հարցին նախագահը պատասխանեց, թե հայերը Ռումինիայում ակտիվորեն ընդգրկված են երկրի հասարակական-քաղաքական կյանքին, խորհրդարանում ունեն մեկ պատգամավոր: «Մեր խորհրդարանում ներկայացված են իտալացիներ, թուրքեր, անգամ գնչուներ: Ընդհանուր առմամբ Ռումինիան ազատ եւ ժողովրդավար երկիր է այս առումով:
Մեզ մոտ բնակվող ազգերի ներկայացուցիչները պահպանում են իրենց լեզուն, ավանդույթները: Կարծում ենքՙ դա միայն հարստացնում է մեր երկրի ինտելեկտուալ ներուժը»:
Կճանաչի՞ Ռումինիան Հայոց ցեղասպանությունը հարցին Ի. Իլիեսկուն դիվանագիտական պատասխան տվեց: Նա նշեց, թե հայերը ողբերգական պատմություն են ունեցել, բայց պատմական խնդիրներն այսօր պիտի գտնեն իրենց լուծումը: «Ռումինիան միշտ էլ ձեզ հետ է», իր պատասխանն ամփոփեց նախագահը:
ԵՊՀ-ում հանդիպումից հետո Ռումինիայի նախագահին եւ պաշտոնական պատվիրակությանը ՀՀ նախագահի նստավայրում սպասում էր պաշտոնական այցի եզրափակման արարողությունը, ինչից հետո Իոն Իլիեսկուն մեկնեց Հայաստանից:
ԼԻԼԻԹ ԳՐԻԳՈՐՅԱՆ